Füzuli Məmmədov: İnanıram ki, “Zirə” düzgün futbolla qrup mərhələsinə yüksələcək
İDMAN
Füzuli Məmmədov: İnanıram ki, “Zirə” düzgün futbolla qrup mərhələsinə yüksələcək
17.08.2024 [16:15]
Füzuli Məmmədov: İnanıram ki, “Zirə” düzgün futbolla qrup mərhələsinə yüksələcək
Bakı, 17 avqust.
“Zirə”nin futbolçuları çətinliyə psixoloji olaraq dözərək növbəti raunda vəsiqə qazandılar. “Sabah” isə bir səhv ucbatından istəyinə nail ola bilmədi”.
Bu sözləri açıqlamasında veteran futbolçu Füzuli Məmmədov UEFA Konfrans Liqasında pley-offa vəsiqə qazanan “Zirə” və mübarizəni dayandıran “Sabah”ın çıxışını dəyərləndirərkən deyib.
Mütəxəssis “Zirə”nin III təsnifat mərhələsində Xorvatiyanın “Osiyek” klubuna qarşı yaxşı oyun nümayiş etdirdiyini bildirib: “Rəşad Sadıqovun yetirmələri düzgün futbol oynadılar. Daim hücuma atıldılar. Hesabda geri düşmələrinə baxmayaraq, özlərinə inamlarını itirmədilər və qol vurdular. Rəqib ikinci qolu vurduqdan sonra “Zirə” yenə də dayanmadı, hücum edib hesabı bərabərləşdirdi. Epizodlara fikir verirdim. Hücumlar zamanı cərimə meydançasının daxilində “Zirə”nin 3-4 nəfər futbolçusu olurdu. Bu, mənim çox xoşuma gəldi. Komandanın taktikası, rəqibdən çəkinməyərək, dominant futbol oynaması, irəli atılmaları və qol vurmaq arzularını çox bəyəndim”.
O, paytaxt təmsilçisinin pley-off mərhələsində qarşılaşacağı Kiprin “Omoniya” klubu ilə şanslarını dəyərləndirib: “Avrokuboklarda bütün oyunlar çətindir. Görüşlərə düzgün hazırlaşdıqda isə nisbətən asan olur. Bu baxımdan düşünürəm ki, “Zirə”də heç bir problem yoxdur. Rəqibi düzgün analiz edib, bu oyuna da çox ciddi hazırlaşacaqlar. Artıq futbolçularda özünəinam da artıb. Düşünürəm ki, pley-off mərhələsində də özlərini yaxşı tərəfdən göstərə bilərlər. Komanda “Omoniya”nı keçə biləcək gücə sahibdir. Amma bu o demək deyil ki, “Zirə” üçün qələbə rahat olacaq. Çünki rəqib də oyuna ciddi hazırlaşacaq. Amma düşünürəm ki, düzgün futbolla qrup mərhələsinə yüksələcək komanda “Zirə” olacaq”.
Keçmiş futbolçu penaltilər seriyasında 5 topdan 4-nü dəf edən qapıçı Tiaqo Silva barədə də danışıb: “Penaltilər seriyasında qapıçımız çox ağıllı oynadı. Komandanın növbəti raunda vəsiqə qazanmasında onun böyük rolu oldu. Möhtəşəm çıxış etdi. Amma futbolçuların da əziyyətini yerə vurmaq olmaz. Çünki 120 dəqiqə meydanda vuruşdular. Onlarla yanaşı, texniki heyət, məşqçilər korpusu, bir sözlə komandada hər kəsin bu uğurda əziyyəti var”.
Hazırda 18 yaşadək futbolçulardan ibarət Azərbaycan millisinin baş məşqçisi olan F.Məmmədov avrokuboklarla vidalaşan “Sabah”ın çıxışına da toxunub: “Komandamız III təsnifat mərhələsində İrlandiyanın “Sent Patriks” klubuna qarşı heç də pis oyun nümayiş etdirmədi. Növbəti raunda keçə bilməmələri onların zəif olduğu anlamına gəlmir. Oyuna düzgün hazırlaşmışdılar. Səfərdəki matçda uduzmalarına baxmayaraq, ağıllı futbol oynamışdılar. Görüşün ilk hissəsində üstünlük “Sabah”da idi. Amma rəqib də iddialı idi. Sadəcə, bir səhv matçın taleyini həll etdi. Yanlış ötürmə və müdafiəçinin doğru qərar verməməsi oyunun gedişatına təsir etdi. Sofyan Şaklanın qırmızı vərəqə alaraq meydanı tərk etməsi “Sabah”ın mərhələ adlamasına mane oldu. Amma futbolçular azlıqda qalsa belə irəli atılıb qol vurmaq istəyirdilər. Çoxlu qol epizodları yaratdılar. Onlardan biri qola çevrilsəydi, indi vəziyyət tamam başqa olardı. Düşünürəm ki, bu da onlar üçün bir təcrübə oldu. Güclü komandaya qarşı belə səhvlər etmək olmaz. Bu cür oyunlarda belə səhvlər bağışlanmır. Ümid edirəm ki, növbəti mövsümdə daha yaxşısını edəcəklər”.
