Laçın, 30 noyabr.

İl ərzində Laçın MDB məkanında dostluq, qarşılıqlı anlaşma və yaradıcı əməkdaşlıq dəyərlərinin parlaq təcəssümünə çevrilib.

Bunu Azərbaycanın mədəniyyət nazirinin müavini Fərid Cəfərov “MDB ölkələrində müasir kino istehsalının inkişafı” mövzusunda keçirilən dəyirmi masada deyib.

O, qeyd edib ki, Azərbaycan dövləti kino sənayesinin və kinematoqrafiyanın inkişafını uzunmüddətli strateji prioritet kimi müəyyənləşdirib.

“Azərbaycan Respublikasının Mədəniyyət Nazirliyinin nəzdində fəaliyyət göstərən Azərbaycan Respublikası Kino Agentliyi son üç il ərzində dövlət sifarişi ilə ümumilikdə 70-dən artıq kino layihəsinin istehsalına maliyyə dəstəyi göstərib. Bu layihələrin 50-dən çoxu artıq tamamlanaraq tamaşaçıların ixtiyarına verilib. Ümumilikdə 34 yerli istehsal şirkətinə 20 milyon manatdan artıq dövlət dəstəyi ayrılıb. Bu dəstək Azərbaycanda kino sənayesinin inkişafına kapital qoyuluşudur”, – deyə o, əlavə edib.

Fərid Cəfərovun sözlərinə görə, kino istehsalına çəkilən xərclərin qismən geri qaytarılması mexanizmi olan “rebate” Azərbaycan Respublikasında Prezident İlham Əliyevin 25 may 2025-ci il tarixli Sərəncamına uyğun olaraq tətbiq olunur. Bu mexanizm ölkəmizdə film çəkilişləri üçün əlverişli şərait yaradır və Azərbaycanı xarici prodüserlər üçün daha cəlbedici kino məkanına çevirib.

“Son üç ildə ənənəvi olaraq Azərbaycanda Qazaxıstanın, Tacikistanın, Qırğızıstanın və Rusiyanın kino günləri keçirilir ki, bu da ölkələrimiz arasında mədəni mübadiləni daha da möhkəmləndirir. Həmçinin, qeyd etmək istərdim ki, bu ilin 25–27 avqust tarixlərində “Laçın – MDB-nin mədəniyyət paytaxtı 2025” proqramı çərçivəsində MDB ölkələrinin beynəlxalq kino günləri təşkil olunub”, – deyə F. Cəfərov söyləyib.

Nazir müavini əminliyini ifadə edib ki, bu gün Laçında formalaşan, mədəni vəhdət və qarşılıqlı hörmətə əsaslanan əməkdaşlıq ruhu gələcək illərdə də qorunub saxlanacaq.