Bakı, 6 mart.

Naxçıvanda mülki obyektlərin pilotsuz uçuş aparatları ilə hədəfə alınması regional təhlükəsizlik baxımından son dərəcə təhlükəli presedentdir.

Bu fikirləri açıqlamasında Türkiyənin Azərbaycandakı keçmiş hərbi attaşesi, ehtiyatda olan general Yücel Karauz bildirib.

General qeyd edib ki, Naxçıvan Muxtar Respublikasının ərazisində mülki hədəflərin pilotsuz uçuş aparatları ilə vurulması hansı hərbi əsasla izah edilməyə çalışılsa da, regional təhlükəsizlik baxımından son dərəcə təhlükəli həddin aşılması kimi qiymətləndirilməlidir.

Y.Karauz vurğulayıb ki, yaranmış vəziyyət artıq yalnız iki ölkə arasında diplomatik gərginlik çərçivəsində deyil, birbaşa mülki infrastrukturun təhlükəsizliyi və dövlət suverenliyi məsələsi kontekstində qiymətləndirilməlidir. Türk generalın fikrincə, baş verən hadisənin bir neçə mühüm nəticəsi ola bilər: “Birincisi, Azərbaycan xüsusilə Naxçıvan istiqamətində hava hücumundan müdafiə sistemlərini, erkən xəbərdarlıq və sərhəd təhlükəsizliyi mexanizmlərini daha da gücləndirəcək. İkincisi, Bakı ilə Tehran arasında onsuz da kövrək olan etimad mühiti ciddi şəkildə zədələnib. Əgər üzr istənilməsi, şəffaf araşdırma aparılması və bu hadisəyə görə məsuliyyət daşıyan şəxslərin cəzalandırılması ilə bağlı tələblər qarşılanmasa, münasibətlər uzun müddət davam edə biləcək nəzarətli gərginlik mərhələsinə daxil ola bilər. Üçüncüsü isə bu hadisə yalnız Azərbaycan–İran münasibətlərinə deyil, həm də Türkiyə, Cənubi Qafqazdakı tranzit xətləri, eləcə də regionun enerji və təhlükəsizlik balansına dair hesablamalara da təsir göstərə bilər”, – deyə o bildirib.

Y.Karauz qeyd edib ki, mülki hədəflərə qarşı istənilən hücum qəti şəkildə pislənilməlidir. “Azərbaycanın hadisəyə verdiyi reaksiya beynəlxalq hüquq, dövlət suverenliyi və deterrensiya baxımından tamamilə başa düşülən və legitimdir.

General əlavə edib ki, bundan sonrakı mərhələdə ən vacib məsələ emosional deyil, strateji yanaşmanın üstün tutulmasıdır. “Bir tərəfdən, Azərbaycanın deterrensiya qabiliyyəti açıq şəkildə nümayiş etdirilməlidir. Digər tərəfdən isə hadisənin daha geniş regional münaqişəyə çevrilməsinin qarşısını almaq üçün diplomatik kanallar açıq saxlanmalıdır. Çünki Naxçıvan kimi həssas geosiyasi məkanda baş verən hər hansı insident təkcə iki ölkə arasında deyil, bütün Cənubi Qafqaz regionunda daha geniş təhlükəsizlik reaksiyası yarada bilər”, – deyə o vurğulayıb.

Y.Karauz bildirib ki, Azərbaycan Qarabağ Zəfərindən sonra regionda güclü dövlət kimi mövqeyini möhkəmləndirib və Cənubi Qafqazın ən güclü aktorlarından biridir: “Heç kim Azərbaycanın gücünü sınağa çəkməməlidir. Belə cəhdlərə qarşı Azərbaycanın “dəmir yumruğu” iradəsi yerindədir. Şuşa ruhu yaşayır və Azərbaycanla bağlı hesab aparanlar Türkiyəni, Qars müqaviləsini, Şuşa Bəyannaməsini və qəlbi Azərbaycanla döyünən 86 milyonluq türk xalqını da unutmamalıdırlar”, – deyə general əlavə edib.