Bakı, 22 İyul.

Prezident İlham Əliyevin Almaniyaya rəsmi səfəri Azərbaycan–Almaniya münasibətlərinin tarixində keyfiyyətcə yeni mərhələnin başlanğıcı kimi qiymətləndirilə bilər.

Bu fikirləri açıqlamasında Beynəlxalq Münasibətlərin Təhlili Mərkəzinin şöbə müdiri Vasif Hüseynov deyib.

Onun sözlərinə görə, səfərin ən mühüm nəticəsi Azərbaycan ilə Almaniya arasında İkitərəfli Tərəfdaşlıq üçün Strateji Gündəlik haqqında Birgə Bəyannamənin imzalanması və Alman–Azərbaycan Biznes Şurasının yaradılması olub. Bu addımlar əməkdaşlığı uzunmüddətli, institusional və çoxşaxəli strateji tərəfdaşlıq müstəvisinə keçirir. Səfər təkcə ikitərəfli münasibətlər baxımından deyil, həm də Azərbaycan–Avropa İttifaqı əməkdaşlığının gələcək inkişafı nöqteyi-nəzərindən mühüm siyasi əhəmiyyət daşıyır. Almaniya Avropa İttifaqının ən böyük iqtisadiyyatı və aparıcı siyasi gücü kimi Azərbaycanla strateji gündəlik formalaşdırmaqla Aİ daxilində ölkəmizlə əməkdaşlığın dərinləşdirilməsinə mühüm siyasi impuls verir. Bu baxımdan, Almaniya İtaliyadan sonra Azərbaycanın Qərbi Avropanın ikinci böyük dövləti ilə strateji çərçivə sənədi imzaladığı ölkəyə çevrilib ki, bu da Azərbaycanın Avropanın əsas siyasi və iqtisadi mərkəzləri ilə münasibətlərinin ardıcıl şəkildə yeni səviyyəyə yüksəldiyini göstərir.

V.Hüseynov vurğulayıb ki, enerji sahəsində əldə olunan nəticələr də xüsusi əhəmiyyət kəsb edir. "Son illərdə Azərbaycan Avropanın enerji təhlükəsizliyində etibarlı tərəfdaş kimi mövqeyini əhəmiyyətli dərəcədə gücləndirib. Hazırda Azərbaycan qazı Avropa İttifaqının 10 üzv dövlətinə ixrac olunur. Bu il ilk dəfə olaraq Azərbaycan qazının Trans-Adriatik Boru Kəməri vasitəsilə birbaşa Almaniyaya çatdırılması əməkdaşlıqda yeni mərhələ yaradıb. Eyni zamanda, imzalanmış strateji sənəd əməkdaşlığı yalnız təbii qazla məhdudlaşdırmır, yaşıl enerji, hidrogen, enerji səmərəliliyi və iqlim gündəliyi kimi yeni istiqamətləri də əhatə edir. Bu isə Azərbaycanın Almaniyanın enerji transformasiyasında uzunmüddətli tərəfdaş kimi rolunu daha da möhkəmləndirir. Nəqliyyat və logistika sahəsində əməkdaşlığın inkişafı da səfərin əsas nəticələri sırasında yer alır. Almaniya rəhbərliyi Cənubi Qafqazın Avropa ilə Asiyanı birləşdirən strateji bağlantı məkanı kimi artan rolunu açıq şəkildə vurğuladı. Bu, Azərbaycanın Orta Dəhlizin əsas iştirakçısı kimi əhəmiyyətinin Avropanın aparıcı iqtisadiyyatı tərəfindən yüksək qiymətləndirildiyini göstərir”.
O qeyd edib ki, iqtisadi əməkdaşlığın institusional əsaslarının genişləndirilməsi də səfərin mühüm nəticələrindən biridir. Alman–Azərbaycan Biznes Şurasının yaradılması dövlət qurumları ilə özəl sektor arasında davamlı dialoq platforması formalaşdırır, investisiyaların təşviqi, birgə layihələrin hazırlanması, innovasiya və texnologiya transferi üçün yeni imkanlar açır. Bu mexanizm Almaniyanın Azərbaycanın iqtisadi potensialına və regional roluna artan etimadının göstəricisidir.

Şöbə müdiri bildirib ki, regional təhlükəsizlik və sülh məsələləri də danışıqların əsas istiqamətlərindən biri olub. "Almaniya rəhbərliyinin Azərbaycan–Ermənistan normallaşma prosesinə və regionda dayanıqlı sülhün əldə olunmasına verdiyi dəstək Azərbaycanın həyata keçirdiyi sülh gündəliyinə beynəlxalq etimadın daha da gücləndiyini göstərir. Bu yanaşma Azərbaycanın Cənubi Qafqazda sabitliyin və əməkdaşlığın təşviqində aparıcı rolunu təsdiqləyir və Avropa dövlətlərinin regiona yanaşmasında praqmatik əməkdaşlığın ön plana çıxdığını nümayiş etdirir”, -deyə o əlavə edib.