Azərbaycan 30 ildən çoxdur NATO ilə əməkdaşlıq edir. Belə ki, 1994-cü ildə ölkəmiz hərbi alyansın “Sülh naminə tərəfdaşlıq” proqramına qəbul edilib. Bu illər ərzində Azərbaycan təşkilatın bütün strateji layihələrində uğurla təmsil olunub.
Qurumun Baş katibi Yens Stoltenberqin martın 17-də ölkəmizə səfəri zamanı Azərbaycanın Kosovo və Əfqanıstanda sülhməramlı əməliyyatlarda iştirakı sayəsində əldə etdiyi uğurlu təcrübə, Əfqanıstanı tərk edən sonuncu müttəfiq qüvvələr kimi əməkdaşlıqda sadiqlik xüsusi vurğulandı. NATO-nun Baş katibi məhz Azərbaycanın hava limanının mühafizəsinə görə cavabdehliyi NATO qüvvələrinin Əfqanıstandan təxliyəsində əsas məsələ olduğunu bildirdi.
Bu sözləri Milli Məclisin deputatı Könül Nurullayeva söyləyib.
NATO-nun Azərbaycanı etibarlı uzunmüddətli tərəfdaş hesab etdiyini bildirən deputat Cənubi Qafqazda təhlükəsizlik məsələsinin Alyansın gündəmində olduğunu diqqətə çatdırıb.
“NATO rəhbərliyi də hesab edir ki, uzun illərin münaqişəsindən sonra Ermənistanla Azərbaycan arasında hazırda davamlı sülhə nail olmaq imkanı var. Hərbi alyans Ermənistanla dayanıqlı sülh sazişinə nail olmaq üçün həmin fürsətdən istifadə etməkdə rəsmi Bakını dəstəkləyir”, - deyən K.Nurullayeva əlavə edib ki, görüşlərdə Azərbaycanın enerji təhlükəsizliyində roluna diqqətin çəkilməsi isə təsadüfi deyildi. Çünki vaxtilə Norveçin energetika naziri qismində ölkəmizə səfərdə olan Yens Stoltenberq Azərbaycanın enerji potensialını düzgün idarə edildiyini görüb. Azərbaycanın Avropanın enerji təhlükəsizliyinə verdiyi töhfə NATO-nun ölkəmizə diqqətini artırır. Təsadüfi deyil ki, Azərbaycanın bu gün qaz nəql etdiyi Avropanın 8 ölkəsindən 6-sı NATO üzvü, 2-si isə hərbi blokun tərəfdaşıdır.
“Yens Stoltenberq, həmçinin Prezident İlham Əliyev tərəfindən Azərbaycanın ev sahibliyi edəcəyi COP29-a qonaq kimi dəvət olundu. Bakıda verilən bəyanatlardan aydın oldu ki, iqlim dəyişmələri təhlükəsizlik baxımından vacib olduğundan NATO üçün də əhəmiyyətlidir. Azərbaycanın təbii qaz ixrac etməklə yanaşı, alternativ enerjiyə sərmayə yatırması Alyans tərəfindən də təqdir olunur”, - deyə deputat qeyd edib.