Otuz ildən sonra Azərbaycanın futbol komandalarının Xankəndi stadionunda oynaması təkcə idman hadisəsi deyildi. Dünyanın aparıcı media orqanları da haqlı olaraq bu qarşılaşmanı Azərbaycan üçün əhəmiyyətli tarixi hadisə kimi təqdim etdilər. Xüsusilə də Prezident İlham Əliyev və onun xanımı Mehriban Əliyevanın Xankəndiyə səfər edərək oyunu canlı izləmələri, dövlətimizin başçısının stadiondakı çıxışı və ilk olaraq topa toxunuşunun böyük tarixi, siyasi və rəmzi mənaları var. Xankəndi stadionundakı dünənki futbol göstərdi ki, bundan sonra Qarabağ xanının kəndində çirkin siyasi oyunlar deyil, sağlam idman yarışları keçiriləcək.
Bu sözləri Politoloq Ramiz Alıyev söyləyib.
Ötən gün hər bir azərbaycanlının qəlbinin iftixar hissi ilə dolduğunu, qürurlandığını qeyd edən politoloq deyib: “Prezident İlham Əliyevin də qeyd etdiyi kimi, Ağdamın “Qarabağ” və Bakının MOİK komandalarının qarşılaşması zamanı udan Azərbaycan oldu. Ermənistanın baş nazirinin lovğalanaraq “Qarabağ Ermənistandır və nöqtə” dediyi bir məkanda dövlətimizin başçısının çıxış etməsi, futbol komandalarımızın oynaması, minlərlə insanın “Qarabağ Azərbaycandır” şüarı səsləndirməsi düşmənin qanını qaraltdı, kefinə soğan doğradı. Otuz il ərzində Ermənistanın siyasi rəhbərliyi, Qarabağdakı separatçılar və onlara havadarlıq edən xarici qüvvələr birləşərək Xankəndidə çirkin oyunlar oynayırdılar, Azərbaycana meydan oxuyurdular. Biz dünən onlara bir daha göstərdik ki, Xankəndiyə eybəcər, iyrənc oyunlar yaraşmır. Xanın kəndi mədəni tədbirlərə, idman yarışlarına, beynəlxalq toplantılara ev sahibliyi etməlidir. Müzəffər Ali Baş Komandan İlham Əliyevin strateji düşüncəsi ötən gün bir daha hər kəsi təəccübləndirdi. 2023-cü il sentyabr ayının 19-20-də keçirilən lokal xarakterli antiterror tədbirlərini uğurla başa çatdıran Azərbaycan dünən siyasi oyunbazlığın tabutuna son mismarlarını vurdu. Artıq Xankəndi stadionunda separatçıların əski parçası deyil, Üçrəngli Bayrağımız dalğalanır, Azərbaycan Respublikasının Dövlət Himni oxunur, Qarabağa aid şüarlar səsləndirilir.
Politoloq bildirib ki, Xankəndi stadionunda keçirilən futbol oyunu çox doğru olaraq Qarabağa gələn əmin-amanlığın, sülhün müjdəsi kimi dəyərləndirlir. Prezident İlham Əliyevin Xankəndi stadionunda “Qarabağ” - MOİK oyunu başlamazdan əvvəl etdiyi çıxışında “Qarabağ-Ordu-Xalq birliyi bizim Zəfərimizin əsas mənbəyidir” mesajı uzun müddət yaddaşlardan silinməyəcək”.
R.Alıyev əlavə edib ki, bundan sonda Xankəndi hələ çox yarışlara, siyasi və mədəni tədbirlərə, beynəlxalq konfranslara ev sahibliyi edəcək: “Füsunkar təbiəti olan Xankəndi 30 ilə yaxın idi ki, sanki qaranlıqda, məhbəsdə saxlanılırdı. Bu gün Xankəndi azaddır. Ölkə rəhbərliyinin yürütdüyü düzgün strategiya nəticəsində Qarabağ yenidən dirçəlir. Azərbaycan xalqı Qarabağda həyata keçirilən quruculuq-abadlıq işlərindən qürur duyur. Bütün dünya da görür ki, biz Qarabağa sülh, həyat gətirmişik. Qarabağ və Şərqi Zəngəzurda həyata keçirdiyimiz siyasət bizim düzgün yolda olduğumuzu göstərir”.