Kiyev, 4 iyul.

Kiyevdə Ukrayna Azərbaycanlıları Birləşmiş Diasporunun (UABD) təşkilatçılığı ilə 4 İyul - Ukrayna Milli Polis Günü münasibətilə bu qurumda çalışan bir qrup soydaşımızla görüş keçirilib.

Tədbirdə Ukrayna hüquq-mühafizə orqanlarında xidmət edən azərbaycanlı polis zabitləri, Azərbaycanın Ukraynadakı səfirliyinin diplomatları və diaspor fəalları iştirak ediblər.

Tədbiri açan UABD-ın sədr müavini Elşad İbrahimov bildirib ki, Ukraynada polis orqanlarında çalışan həmvətənlərimizin nümunəvi fəaliyyəti sevindirici haldır. Onun sözlərinə görə, hazırda müharibə şəraitində Ukraynada polisdə və digər hüquq mühafizə orqanlarında çalışan azərbaycanlıların fəaliyyəti iki qat diqqətə layiqdir. Ukrayna hüquq mühafizə orqanlarında və digər strukturlarda çalışan azərbaycanlıların tarixi vətənləri Azərbaycanla bağlılığı azərbaycanlıların bu ölkədəki birliyi istiqamətində mühüm addımdır.

Professor Fərhad Turanlı, səfirliyimizin konsulu Qalibbəy Ağadadaşov və digərləri də çıxış edərək azərbaycanlı polislərə fəaliyyətlərində uğurlar arzulayıb, peşə bayramlarını təbrik ediblər.

Sonra azərbaycanlı polislər Zeynal Nəsirov, Fərhad Niyazov, Aqil Namazaov, Ali Zeynalov, Tural Əmiraslanov və Eşqin Tanrıverdiyev UABD tərəfindən mükafatlara layiq görülüblər. Xidməti və məsafə səbəbindən tədbirə qatıla bilməyən digər azərbaycanlı polislərə də təbrik və mükafatlar ünvanlanıb.