Bakı, 22 İyul.

Azərbaycan milli mətbuatının yaranması xalqımızın maariflənməsi, milli özünüdərkin formalaşması və ictimai-siyasi fikrin inkişafı tarixində mühüm mərhələdir. Bu tarixi hadisənin əsas memarı olan böyük maarifçi, təbiətşünas alim Həsən bəy Zərdabinin 1875-ci il iyulun 22-də nəşr etdirdiyi “Əkinçi” qəzeti Azərbaycan milli mətbuatının təməlini qoymaqla yanaşı, xalqımızın milli oyanışına və maarifçilik ideyalarının yayılmasına misilsiz töhfələr verib.

Bu fikirləri Milli Məclisin deputatı Elman Nəsirov Azərbaycan milli mətbuatının yaranmasının 151-ci ildönümü münasibətilə açıqlamasında səsləndirib.

Deputat bildirib ki, “Əkinçi” qəzeti təkcə bir mətbuat orqanı deyil, həm də Azərbaycan cəmiyyətinin inkişafına xidmət edən böyük bir maarifçilik hərəkatının başlanğıcı idi. Onun sözlərinə görə, qəzetin işıq üzü görməsində Mirzə Fətəli Axundzadə, Seyid Əzim Şirvani, Nəcəf bəy Vəzirov, Əsgər ağa Gorani və digər görkəmli ziyalılarımızın mühüm xidmətləri olub.

“Cəmi 56 sayı işıq üzü görməsinə baxmayaraq, ‘Əkinçi’ qəzeti Azərbaycan xalqının milli oyanışında və ictimai fikrin formalaşmasında əvəzsiz rol oynayıb. Həmin dövrdə cəmiyyətin böyük hissəsi qəzet oxumağın əhəmiyyətini belə dərk etmirdi. Böyük satirik şairimiz Mirzə Ələkbər Sabirin əsərlərində də qəzet oxumağın bəzən cəmiyyət tərəfindən mənfi qarşılanması təsvir olunurdu. Bu isə həmin dövrün sosial reallıqlarını və maarifçilik ideyalarının nə qədər çətinliklə yayılmasını bir daha göstərir”, – deyə Elman Nəsirov vurğulayıb.

Elman Nəsirov qeyd edib ki, Azərbaycan mətbuatı tarix boyu həm tənəzzül, həm də intibah dövrləri yaşasa da, daim cəmiyyətin güzgüsü rolunu oynayıb və ictimai proseslərin obyektiv şəkildə işıqlandırılmasına xidmət edib.

Deputat Ümummilli Lider Heydər Əliyevin milli mətbuatın inkişafındakı tarixi xidmətlərini xüsusi qeyd edərək bildirib ki, 1998-ci ildə senzuranın ləğvi Azərbaycan mediasının inkişafında yeni mərhələnin başlanğıcı oldu. “Ulu Öndərin imzaladığı müvafiq sərəncamla ölkəmizdə senzura ləğv edildi və söz, fikir və mətbuat azadlığının təmin olunması istiqamətində mühüm addım atıldı. Bu qərar Azərbaycanın demokratik inkişafının və müstəqil medianın formalaşmasının əsas sütunlarından birinə çevrildi”, – deyə o bildirib.

Deputat əlavə edib ki, Prezident İlham Əliyev tərəfindən bu siyasət uğurla davam etdirilir və son illər media sahəsində həyata keçirilən islahatlar Azərbaycan jurnalistikasının müasir çağırışlara uyğun inkişafını təmin edir: “Bu gün Azərbaycan mətbuatı öz inkişafının tamamilə yeni mərhələsini yaşayır. Rəqəmsal medianın sürətli inkişafı, sosial şəbəkələrin informasiya məkanında dominant mövqeyə sahib olması, süni intellekt texnologiyalarının mediaya inteqrasiyası yeni reallıqlar formalaşdırıb. Bu reallıqlar isə jurnalistlərin üzərinə daha böyük məsuliyyət qoyur”.

Onun sözlərinə görə, müasir dövrdə informasiya təhlükəsizliyi məsələləri dövlətlərin milli təhlükəsizliyinin əsas komponentlərindən birinə çevrilib. Bu baxımdan media nümayəndələrinin peşəkarlığı, operativliyi və beynəlxalq auditoriyaya çıxış imkanları xüsusi əhəmiyyət daşıyır.

“Artıq yaşadığımız dövr informasiya müharibələri dövrüdür. Bu gün informasiya cəbhəsində qalib gələn dövlətlər digər sahələrdə də üstünlüklərini təmin edə bilirlər. Ona görə də Azərbaycanın haqq səsini dünyaya çatdırmaq media nümayəndələrinin ən mühüm missiyalarından biridir. Haqlı olmaq kifayət deyil, bu həqiqətləri vaxtında, operativ və peşəkar şəkildə beynəlxalq ictimaiyyətə çatdırmaq da vacibdir”, – deyə deputat bildirib.

Elman Nəsirov xüsusilə 44 günlük Vətən müharibəsi zamanı Azərbaycan mediasının informasiya cəbhəsində göstərdiyi fəaliyyəti yüksək qiymətləndirib. O qeyd edib ki, həm yerli media qurumları, həm də Prezident İlham Əliyevin dünyanın aparıcı media orqanlarına verdiyi müsahibələr informasiya müharibəsində Azərbaycanın mövqelərinin möhkəmlənməsində mühüm rol oynayıb.

Deputat bildirib ki, jurnalistika sahəsində yeni nəsil media mütəxəssislərinin hazırlanması bu gün xüsusi aktuallıq kəsb edir.

“Biz elə bir jurnalistlər nəsli yetişdirməliyik ki, onlar xarici dilləri mükəmməl bilsinlər, rəqəmsal texnologiyaların imkanlarından peşəkar şəkildə istifadə etsinlər və süni intellektin yaratdığı geniş imkanlardan faydalanaraq Azərbaycanın həqiqətlərini beynəlxalq ictimaiyyətə yüksək peşəkarlıqla çatdıra bilsinlər. Müasir jurnalist yalnız məlumat ötürən şəxs deyil, eyni zamanda, informasiya təhlükəsizliyinin təmin edilməsində iştirak edən peşəkar mütəxəssisdir”, – deyə Elman Nəsirov vurğulayıb.

“Şuşa Qlobal Media Forumları müxtəlif ölkələrdən media nümayəndələrini bir araya gətirməklə qlobal informasiya gündəliyinin aktual məsələlərinin müzakirəsi üçün mühüm platformaya çevrilib. Prezident İlham Əliyevin forum çərçivəsində səsləndirdiyi fikirlər və beynəlxalq jurnalistlərin suallarına verdiyi dolğun cavablar Azərbaycanın informasiya siyasətinin beynəlxalq səviyyədə təqdim olunmasına mühüm töhfə verir”, – deyə o əlavə edib.

Elman Nəsirovun sözlərinə görə, müasir dövrdə dezinformasiyanın və saxta xəbərlərin geniş yayıldığı bir şəraitdə operativ və dəqiq informasiya təqdim etmək medianın əsas vəzifələrindən biri olaraq qalır.

Sonda Elman Nəsirov qeyd edib ki, 151 illik şərəfli inkişaf yolu keçmiş Azərbaycan milli mətbuatı bu gün müasir çağırışlara uğurla uyğunlaşaraq ölkəmizin milli maraqlarının qorunması və həqiqətlərinin dünyaya çatdırılması istiqamətində mühüm missiyasını davam etdirir.

Deputat Azərbaycan milli mətbuatının yaranmasının 151-ci ildönümü münasibətilə bütün media nümayəndələrini təbrik edib, onlara peşə fəaliyyətlərində uğurlar arzulayıb.