BMU məzunu Böyük Britaniyada kibertəhlükəsizlik üzrə təhsil alacaq
Bakı Mühəndislik Universitetinin (BMU) məzunu Əli Xəlilov “Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2028-ci illər üçün Dövlət Proqramı” çərçivəsində xaricdə magistratura təhsili almaq hüququ qazanıb.
BMU-dan bildirilib ki, universitetin kompüter mühəndisliyi ixtisası üzrə məzunu olan Əli Xəlilov təhsilini Böyük Britaniyanın nüfuzlu ali təhsil müəssisələrindən olan Vorvik Universitetində kibertəhlükəsizlik ixtisası üzrə davam etdirəcək.
Əli Xəlilov, eyni zamanda, Böyük Britaniyanın digər aparıcı ali təhsil müəssisələri - Mançester Universiteti, Bristol Universiteti və Birminhem Universitetindən qəbul məktubu alıb. Bundan başqa, o, Çin dövlət təqaüdünün qalibi olub.
Qeyd edək ki, Əli Xəlilov 613 balla BMU-nun kompüter mühəndisliyi ixtisasına qəbul olub. O, bu il bakalavriat təhsilini 97,21 ümumi ortalama ilə başa vuraraq fərqlənmə diplomuna layiq görülüb.
