Bakı, 1 iyul.

Bakı Dövlət Universitetinin (BDU) Biologiya fakültəsinin biotexnologiya ixtisası üzrə ilk məzunlarından olan Şəhla Həmidova Cənubi Koreyanın nüfuzlu ali təhsil müəssisələrindən biri sayılan Koreya Universitetində magistratura təhsili almaq hüququ qazanıb. O, ictimai səhiyyə (cəmiyyət sağlamlığı və sosial epidemiologiya) ixtisası üzrə təhsilini davam etdirəcək.

BDU-dan bildirilib ki, Şəhla Həmidova Koreya Respublikasının beynəlxalq tam təqaüd proqramı olan “Global Korea Scholarship” (GKS) proqramının qalibidir. Bu proqram üzrə müraciət edən yüzdən çox tələbə arasından yalnız beş nəfər seçilib.

GKS proqramı çərçivəsində dörd semestrlik təhsil haqqı, hər ay təxminən 1260 manat məbləğində aylıq təqaüd, sağlamlıq sığortası, gediş-gəliş xərcləri və viza dəstəyi daxil olmaqla bütün xərclər tam şəkildə maliyyələşdirilir.

Koreya Universiteti “QS World University Rankings 2026”da dünya üzrə 61-ci yerdə qərarlaşıb.

Şəhla Həmidova bakalavr təhsilini 92.32 bal ortalaması ilə başa vurub. İngilis və Koreya dillərini C1 səviyyəsində bilir.