Azərbaycan Dövlət İnformasiya Agentliyi
DÜNYA
23.03.2024 [12:40]
Rusiyada terror aktı zamanı ölənlərin sayı 93 nəfərə çatıb YENİLƏNİB.
Moskva vilayəti Səhiyyə Nazirliyi “Crocus City Hall” ticarət mərkəzində törədilmiş terror aktı nəticəsində ölənlərin ilkin siyahısını dərc edib.
Siyahıda 37 nəfərin, o cümlədən azərbaycanlı olduğu ehtimal edilən Vüqar Hüseynov adlı şəxsin də adı var.
Rusiya İstintaq Komitəsi hadisə nəticəsində 93 nəfərin həlak olduğunu bildirir
10:12
Sonuncu məlumata görə, “Crocus City Hall” ticarət mərkəzində törədilmiş terror aktı nəticəsində 80 nəfər həlak olub, onlardan 3-ü uşaqdır.
Ölənlərin sayının arta biləcəyi bildirilir. Xəstəxanalarda 121 nəfər müalicə alır.
Həlak olanların rəsmi siyahısı Moskva vaxtı ilə saat 10-da dərc ediləcək.
Hadisəni törətməkdə şübhəli bilinən iki nəfərin Bryansk vilayətində saxlanıldığı bildirilir. KİV-in məlumatına görə, saxlanılan avtomobildə 6 nəfər olub. Onların 4-ü qaçıb. Saxlanılanlar Tacikistan vətəndaşlarıdır.
04:32
Moskvadakı “Crocus City Hall”da törədilən terror aktı nəticəsində ölənlərin sayı 60-ı ötüb.
Bu barədə Rusiya İstintaq Komitəsi məlumat yayıb.
Bildirilib ki, ölənlərin sayının artacağı istisna edilmir.
23:24
İlkin məlumata görə, terror aktı nəticəsində 40 nəfərin ölüb, 100-dən çox insan xəsarət alıb.
Bu barədə Rusiya Federal Təhlükəsizlik Xidməti məlumat yayıb.
Qeyd edək ki, Rusiya İstintaq Komitəsi “terror aktı” maddəsi ilə cinayət işi açıb.
Eyni zamanda, güc strukturlarındakı mənbədən mediaya bildirilib ki, terrorçuların gəldikləri maşın minalanıb və hazırda onun zərərsizləşdirilməsi üçün iş aparılır.