Azərbaycan Silahlı Qüvvələri böyük tarixi və şərəfli yol keçib. 1918-ci ildə qurulmuş Azərbaycan Xalq Cümhuriyyəti isə özünün Əlahiddə Azərbaycan Korpusunu yaratmışdı. Yeni formalaşmış ordu isə o dövrdə qarşısına qoyulmuş vəzifələri icra edirdi. Amma Azərbaycan Xalq Cümhuriyyətinin süqutu ilk yaradılmış milli ordumuzun da fəaliyyətinin dayandırılmasına səbəb oldu. Biz 70 il Sovet İttifaqının tərkibində yaşamağa məhkum olduq. Bu 70 ilin bir hissəsini isə Azərbaycanı müstəqilliyə aparan dövrün başlanğıcı kimi də qeyd edə bilərik. Çünki Azərbaycan Respublikasına rəhbər təyin olunan Heydər Əliyev ölkəmizi müstəqilliyin bərpasına aparacağına inanırdı. Ona görə də milli hərbi kadrların hazırlanması məsələsinə xüsusi diqqət ayırdı. Belə ki, 1971-ci ildən Cəmşid Naxçıvanski adına Hərbi Liseydə azərbaycanlı gənclərin hərbi peşəyə yiyələnməsinə başlandı. Ona qədər isə azərbaycanlılar strateji hərbi peşələrdən uzaqlaşdırılırdı və ordunun inşaat bölmələrində xidmətə cəlb olunurdu.

Bu barədə açıqlamasında Milli Məclisin deputatı Azər Badamov söyləyib.

O bildirib ki, Azərbaycan tarixi prosesin ardıcıllığı olaraq 1991-ci ildə ikinci dəfə müstəqilliyə qovuşdu. Amma vahid mərkəzdən idarə olunan ordumuzun olmaması və pərakəndə şəkildə fəaliyyət göstərən hərbi birləşmələrdəki özbaşınalıq ərazilərimizin itirilməsi ilə nəticələndi. 1994-cü ilin iyunun 15-də Ümummilli Lider Heydər Əliyevin hakimiyyətə qayıdışı ordu quruculuğu sahəsində də yeni bir səhifənin açılmasına səbəb oldu, pərakəndə hərbi birləşmələri bir komandanlıq altında birləşdirərək nizami ordu yaradıldı. Orduda nizam-intizam yüksək səviyyəyə qaldırıldı və qısa zamanda dahi Liderin rəhbərliyi ilə tarixi Horadiz əməliyyatı həyata keçirilərək düşmən atəşkəsə imza atmağına məcbur edildi.

Ulu Öndərin dövlətə rəhbərlik təcrübəsi sayəsində orduya diqqət artırıldı. Bununla da Azərbaycanda nizami ordunun formalaşdırılması prosesi başladı. Prezident İlham Əliyev də Ümummilli Liderin siyasi kursunu uğurla davam etdirərək ordu quruculuğuna böyük diqqət ayırdı. Çünki ordumuzun qarşısında torpaqların erməni işğalından azad edilməsi kimi məsuliyyətli bir vəzifə dayanırdı. Bu səbəbdən də dövlət büdcəsinin əhəmiyyətli hissəsi müdafiə xərclərinə cəlb edildi. Əsgər və zabitlərin xidmət şəraiti yaxşılaşdırıldı, orduya yeni hərbi texnika və silahlar alındı. Eyni zamanda, ordumuz mütəmadi olaraq hərbi təlimlərə cəlb olunaraq peşəkarlığı artırıldı. Qısa zaman ərzində Azərbaycan Ordusu dünya miqyasında 50 ən güclü ordu sırasına yüksəldi.

“2016-cı ilin Aprel döyüşləri və 2018-ci ilin Günnüt əməliyyatı Ordumuzun gücünün qismən nümayişi idi. Biz düşmənə öz gücümüzü göstərdik və ermənilərə danışıqlar prosesində konstruktivlik nümayiş etdirməyin vacibliyini bildirdik. Amma təəssüf ki, düşmən bizim gücümüzü ciddi qəbul etmədi və İkinci Qarabağ müharibəsinin başlanmasını qaçılmaz etdi. Ermənistanın növbəti təxribatlarına cavab olaraq 2020-ci ilin sentyabrın 27-də əks-həmlə əməliyyatlarına başlayan müzəffər Ordumuz Ali Baş Komandanın əmrini rəhbər tutaraq sinəsini düşmən gülləsinə sipər etdi. Ordumuz düşmənin 30 ildə qurduğu müdafiə xətlərini 44 günə aşaraq yeni bir tarix yazdı. Savaşın hər bir günündə xalqımız qələbələrə sevindi və qəhrəmanlıq salnaməsinə şahid oldular. Nəhayət, noyabrın 8-də qəhrəman əsgərlərimiz üçrəngli Dövlət Bayrağımızı Şuşada dalğalandırmaqla Ermənistanı diz çökdürdü və düşməni kapitulyasiya aktına imza atmağına məcbur etdi. Postmüharibə dövründə də Silahlı Qüvvələrimiz Qarabağda və şərti sərhəddə keçirdiyi əməliyyatlarla uğurlarını davam etdirdi. Ötən ilin sentyabrın 19-20-də həyata keçirilən antiterror tədbirləri isə bütün ərazilərimizdə Azərbaycan Bayrağının dalğalandırılması ilə dövlət suverenliyinin tam bərpasını şərtləndirdi. Bu gün Azərbaycan bütövdür və öz ərazilərini güclü şəkildə müdafiə edir. Bu uğura isə qalib Sərkərdənin qalib Ordusu sayəsində nail olduq. Ordumuz müstəqilliyimizin qarantı, təhlükəsizliyimizin təminatçısıdır. Bu baxımdan da Ordumuzun qazandığı Zəfər beynəlxalq arenalarda sözümüzün gücünü artırır”, - deyə A.Badamov vurğulayıb.