Bakı, 20 aprel.

İran Prezidenti Məsud Pezeşkian bazar ertəsi günü ABŞ ilə gərginliyi azaltmaq üçün bütün rasional və diplomatik yolların araşdırılmalı olduğunu bildirib, amma əlavə edib ki, Vaşinqtonla münasibətlərdə sayıqlıq və inamsızlıq “danılmaz bir zərurətdir”.

İran ilə ABŞ arasında ikihəftəlik atəşkəs rejiminin müddəti çərşənbə günü başa çatacaq. “Reuters” agentliyinin məlumatına görə, ABŞ nümayəndələrinin bazar ertəsi günü İranla danışıqlar aparmaq üçün İslamabada gəlməsi planlaşdırılır, Tehran isə hələlik Pakistana nümayəndə heyəti göndərib-göndərməyəcəyini açıqlamayıb.

Dövlət xəbər agentliyi IRNA adı açıqlanmayan mənbəyə istinadla bildirib ki, ABŞ-nin “ifrat və irrasional” tələbləri, eləcə də onun mövqeyindəki dəyişiklik səbəbindən danışıqların ikinci mərhələsi üçün heç bir plan yoxdur.

IRNA-nın məlumatına görə, Pezeşkian bildirib ki, ABŞ-nin İran limanlarını blokadaya alması Vaşinqtonun “əvvəlki davranış nümunələrini təkrarladığını və diplomatiyaya xəyanət etdiyini” göstərir.