Milli Gimnastika Arenasında Azərbaycan Dövlət Neft və Sənaye Universiteti (ADNSU) tələbələrinin “Məzun günü” keçirilib.
Dövlət Himninin səsləndirilməsi ilə başlanan tədbirdə Ulu Öndər Heydər Əliyevin və şəhidlərimizin əziz xatirəsi bir dəqiqəlik sükutla yad edilib.
Universitetdən bildirilib ki, tədbirdə çıxış edən ADNSU-nun rektor əvəzi dosent Vazeh Əskərov yüksəkixtisaslı mühəndislər yetişdirən bu ali təhsil müəssisəsində tədrisin müasir tələblərə uyğun təşkili, universitetin elmi nailiyyətləri və beynəlxalq elmmetrik bazalarda yüksək pillələrdə qərarlaşması haqqında məlumat verib. O vurğulayıb ki, Prezident İlham Əliyevin diqqət və qayğısı sayəsində ölkədə ali təhsil sahəsində aparılan islahatlar öz nəticələrini verməkdədir. Bu gün ADNSU-nun 18 ixtisası beynəlxalq akkreditasiyadan keçib, təhsil müəssisəsi QS reytinq sıralamasında dünyanın 50 mindən artıq ali məktəbi arasında ilk 1200 universitet sırasında yer alıb. ADNSU-dan bu il 4050 tələbə məzun olur və onlar dövlətimiz, xalqımız üçün fayda verə biləcək ixtisaslı mütəxəssislərdir.
“Məzun günü”ndə gənclər və idman naziri Fərid Qayıbov, elm və təhsil nazirinin müavini İdris İsayev, VI çağırış Milli Məclisin deputatı Sadiq Qurbanov, Nəsimi Rayon İcra Hakimiyyətinin başçısı Asif Əsgərov, SOCAR-ın vitse-prezidenti Arzu Cavadova çıxış edərək Azərbaycanda gənclərin savadlı və sağlam formalaşmasının hər zaman prioritet olduğunu bildiriblər. Çıxışlarda Azərbaycanda, eyni zamanda, ölkə hüdudlarından kənarda ADNSU-nun yetişdirdiyi mühəndis kadrların neft sənayesinin inkişafına verdiyi töhfələrdən bəhs olunub. Qonaqlar diqqətə çatdırıblar ki, istehsalatda bu qocaman təhsil ocağının yetişdirdiyi mütəxəssislərə tələbat hər zaman yüksəkdir.
“Məzun günü”ndə universitetin illik fəaliyyəti və tədris prosesindən bəhs edən videomateriallar nümayiş olunub, ən yaxşı tələbələr mükafatlandırılıblar.
Tədbir bədii hissə ilə davam edib.