Bakı Hərbi Kollecində kommunikasiya sahəsində qarşıya çıxan problemlər müzakirə olunub
Bakı Hərbi Kollecində Azərbaycan Respublikası Prezidentinin Administrasiyası, Ombudsman Aparatı, Müdafiə, Əmək və Əhalinin Sosial Müdafiəsi, Elm və Təhsil, Səhiyyə, Gənclər və İdman, Mədəniyyət nazirlikləri, Hərbi Prokurorluq, Səfərbərlik və Hərbi Xidmətə Çağırış üzrə Dövlət Xidməti, Bakı şəhər və rayon icra hakimiyyətlərinin Vətən müharibəsi iştirakçıları və şəhid ailələri ilə işin təşkili şöbələrinin nümayəndələrinin iştirakı ilə seminar keçirilib.
Müdafiə Nazirliyinin mətbuat xidmətindən bildirilib ki, seminar Ümummilli Lider Heydər Əliyevin, Vətən uğrunda şəhid olanların və dekabrın 25-də baş vermiş aviaqəza nəticəsində həlak olanların əziz xatirəsinin bir dəqiqəlik sükutla yad edilməsi və Azərbaycan Respublikasının Dövlət Himninin səsləndirilməsi ilə başlayıb.
Tədbirdə çıxış edən Prezident Administrasiyası Kommunikasiya siyasəti sektorunun müdiri Cavid Musayev düzgün kommunikasiya siyasətinin vahid səs prinsipi əsasında qurulmasının vacibliyini vurğulayıb. O, qurumların kommunikasiya strategiyalarının daha da təkmilləşdirilməsi məqsədilə qarşılıqlı əlaqədə müvafiq tədbirlərin görülməsi, proaktiv və reaktiv fəaliyyətlərin düzgün və səmərəli planlanmasının zəruriliyini qeyd edib.
Müdafiə Nazirliyinin Mətbuat və İctimaiyyətlə Əlaqələr İdarəsinin rəisi polkovnik Anar Eyvazov çıxışında nazirliyin Kommunikasiya Strategiyası ilə bağlı ətraflı məlumat verib. Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə ordumuzda aparılan islahatlar və tətbiq edilən yeniliklər barədə ictimaiyyətin mütəmadi olaraq məlumatlandırılması, vətəndaş məmnunluğunun təmin edilməsi istiqamətində görülən işlərdən danışıb.
Tədbirdə, həmçinin kommunikasiya sahəsində görülən işlər, qarşıya çıxan problemlər və onların həlli yolları müzakirə olunub. Bu seminarın kommunikasiya sahəsində əməkdaşlığın və koordinasiyanın daha da gücləndirilməsi üçün mühüm platforma olduğu qeyd edilib.
Qoşun (qüvvə) növləri, birliklər, eləcə də xüsusi təyinatlı təhsil müəssisələrinin ideoloji iş üzrə məsul şəxslərinin də iştirak etdiyi seminarın sonunda ətraflı fikir mübadiləsi aparılıb, qarşılıqlı suallar cavablandırılıb və mövzu ilə bağlı təkliflər dinlənilib.
