Bakı, 27 May.

Vətən müharibəsində Hərbi tibb fakültəsinin şəxsi heyəti döyüş bölgələrində – cəbhə xəttində və səyyar hospitallarda – tibbi təminatın təşkilində yaxından iştirak edib. Tibbi xidmətin keyfiyyətinin yüksəldilməsi, yaralıların vaxtında və səmərəli şəkildə müalicəsi bölmələrin döyüş qabiliyyətinin qorunmasında böyük rol oynayıb.

Bunu Milli Müdafiə Universitetinin (MMU) rektoru general-mayor Gündüz Əbdülov Azərbaycan Tibb Universitetində (ATU) Hərbi tibb fakültəsinin yaranmasının 25 illik yubileyinə həsr edilmiş “Hərbi təbabətin aktual problemləri - 2025” adlı elmi-praktik konfransın açılışında deyib.

ATU-da Hərbi tibb fakültəsinin 2000-ci ildə yaradıldığını bildirən G.Əbdülov fakültədə hərbi tibbi təhsilin bütün formalarının mərkəzləşdirildiyini diqqətə çatdırıb: “Hərbi tibb fakültəsinin tapşırığı Azərbaycan Respublikası Silahlı Qüvvələrinin ehtiyacına uyğun hərbi həkim və feldşer hazırlamaq, ordunun tibb heyətinin müxtəlif ixtisaslar üzrə təkmilləşdirilməsini həyata keçirməkdir. Birinci Qarabağ müharibəsindən çıxarılan nəticələr Hərbi tibb fakültəsinin professor-müəllim heyəti tərəfindən təhlil olunmaqla tədrisdə yeniliklərin tətbiq edilməsi və kursantlar tərəfindən mənimsənilməsi nəticəsində Vətən müharibəsində tibbi təminat yüksək səviyyədə təşkil olundu. Vətən müharibəsində Səhiyyə Nazirliyi, TƏBİB və güc strukturlarının tibb xidmətləri ilə birgə həyata keçirilən fasiləsiz fəaliyyətlər döyüş itkilərinin və əlillik hallarının azaldılmasına səbəb oldu. Prezident İlham Əliyevin tapşırığına əsasən cəbhəboyu rayon və şəhərlərimizdə inşa edilmiş müasir tibb müəssisələri qoşunlara operativ və fasiləsiz tibbi dəstəyi təmin edib, müharibənin gedişatında böyük rol oynayıb. Müdafiə Nazirliyi Hərbi tibb fakültəsinin fəaliyyətinə daim yüksək əhəmiyyət verib, vəzifələrinin icrasına hər zaman xüsusi diqqət ayırıb. Nazirliyin beynəlxalq hərbi əməkdaşlıq çərçivəsində tibb ixtisaslı hərbi qulluqçuların xaricdə təhsilinə geniş imkanlar yaradılıb. Hər il fakültəyə qəbul olunmuş abituriyentlərdən ən yüksək bal toplayanlar xarici ölkələrə, xüsusilə Türkiyə Respublikası Gülhanə Tədris və Araşdırma Xəstəxanasına təhsil almağa göndərilir. Hazırda Hərbi tibb fakültəsinin hərbi həkim hazırlığı kurslarının 43 kursantı Türkiyədə, 3 kursantı Rusiya Federasiyasının Hərbi Tibb Akademiyasında, 1 kursantı İtaliyada hərbi həkim ixtisası üzrə təhsil alır. Hərbi tibb fakültəsinin Feldşer hazırlığı kursunun 8 kursantı Türkiyədə Gülhanə Tədris Araşdırma Xəstəxanasına təhsil almaq üçün göndərilib, təhsili bitirdikdən sonra 2 kursantının 14 ay müddətində diplomdan sonrakı təhsil məqsədilə Almaniyada kursa göndərilməsi planlaşdırılıb. Hərbi tibb fakültəsinin rezidenturasında təhsil alan rezidentlər bütün xərcləri qarşılanmaqla təhsilin son kursunda Gülhanə Tədris Araşdırma Xəstəxanasında rotasiya keçirlər. Həmin proqram çərçivəsində hazırda Hərbi tibb fakültəsinin 9 nəfər rezidenti həmin müəssisədə təcrübəyə cəlb olunub. Hərbi tibb fakültəsinin kursantlarının xaricdə ölkəmizi təmsil etmələri, bilik və bacarıqlarını nümayiş etdirmələri həmin dövlətlər tərəfindən yüksək qiymətləndirilir. Bu da öz növbəsində fakültənin sadəcə ölkə daxilində deyil, xaricdə də nüfuzunun artmasına səbəb olur”.

General-mayorun sözlərinə görə, ötən ildən etibarən MMU-da sənədlərin qəbulu ilə əlaqədar vətəndaş məmnunluğunun və müraciətlərin əlçatanlığının yüksəldilməsi məqsədilə respublikanın müxtəlif şəhər və rayonlarında 17 sənəd qəbulu məntəqələri yaradılıb. Nəticədə Hərbi tibb fakültəsinə sənəd verənlərin və qəbul olanların sayı və qəbul balları yüksəlib. Əvvəlki illərlə müqayisədə hərbi tibb ixtisasına qəbul olanların sayında 51, qəbul olanların keçid balında 14, qəbul olanların bal ortalamasında isə 9,2 faiz artım qeydə alınıb. Həmçinin feldşer hazırlığı kursuna qəbul olanların sayı 16, qəbul olanların keçid balı 31, qəbul olanların bal ortalaması isə 27,4 faiz yüksəlib. Bu il həyata keçirilən islahatlar nəticəsində Hərbi tibb fakültəsinə sənəd qəbulu rəqəmsal portal üzərindən icra olunur.