Dekabrın 1-i dünyada QİÇS-lə Mübarizə Günüdür
Hər il dekabrın 1-i dünyada QİÇS-lə (Qazanılmış İmmun Çatışmazlığı Sindromu) Mübarizə Günü kimi qeyd edilir. İİV virusunun artım sürəti təqvimdə onunla əlaqədar beynəlxalq günün təsis edilməsinə səbəb olub. Həmin gün hər yerdə QİÇS epidemiyası haqqında, onun bəşəriyyət üçün doğurduğu fəlakətin miqyası, XX əsrin vəbası hesab olunan infeksiyanın XXI əsrə adlayaraq təhlükə törətməsi barədə danışılır.
Ümumdünya QİÇS-lə Mübarizə Günü 1988-ci ildən qeyd edilir. 1981-ci il iyunun 5-də Amerika Xəstəliklər Üzərində Nəzarət Mərkəzinin aşkar etdiyi QİÇS bəşəriyyətin üzləşdiyi ən dəhşətli xəstəliklərdən birinə çevrilib. Həmin günün beynəlxalq səviyyədə qeyd edilməsi dünyanın bütün regionları üzrə yayılan İİV infeksiyasının və QİÇS-in pandemiyası ilə mübarizədə səylərin birləşdirilməsinə xidmət edir. QİÇS-lə Mübarizə Gününün qeyd olunmasında əsas məqsəd dünya ölkələrini problemlə mübarizədə bir araya gətirməkdir.
Ölkəmizdə QİÇS xəstəsi ilk dəfə 1987-ci ildə qeydə alınıb. Səhiyyə Nazirliyinin QİÇS-lə Mübarizə Mərkəzinin verdiyi məlumata görə, bu ilin on bir ayı ərzində immun çatışmazlığı virusunun (İİV) törətdiyi xəstəliklə müalicə-profilaktika müəssisələrində 1130 xəstə qeydiyyata alınıb. Onların 1109 nəfəri Azərbaycan vətəndaşıdır. Onlardan 824 nəfəri kişi, 284 nəfəri qadındır.
Rəsmi statistikaya görə, hazırda ötən ilin yekunlarına görə dünyada İİV-lə yaşayan 40,8 milyon nəfər var. Azərbaycan region ölkələri arasında ən az yoluxma müşahidə olunan ölkədir.
