Cənub Qaz Dəhlizi layihəsi 10 il əvvəl başlayıb və Avropanın enerji təhlükəsizliyi baxımından çox mühüm rola malikdir.
Bu sözləri Cənub Qaz Dəhlizi Məşvərət Şurası çərçivəsində nazirlərin 10-cu və Yaşıl Enerji Məşvərət Şurası çərçivəsində ikinci iclasında iştirak edən Gürcüstan Baş nazirinin birinci müavini, iqtisadiyyat və davamlı inkişaf naziri Levan Davitaşvili gürcü jurnalistlərə müsahibəsində söyləyib.
“Bizim həm avropalı tərəfdaşlarla, həm də Azərbaycan və Türkiyə ilə sıx əməkdaşlığımız var. Bu da qarşıdakı illərdə bu layihənin imkanlarının daha da artmasına və Avropaya qaz tədarükü istiqamətində daha da böyük rol oynamasına imkan yaradır. Təbii ki, Gürcüstanın da öz iqtisadi maraqları var və onlar mümkün qədər ifadə edilməlidir”, - deyə Levan Davitaşvili vurğulayıb.
Onun sözlərinə görə, Bakıda keçirilən budəfəki görüş Gürcüstan üçün tərəfdaş ölkələrlə enerji təhlükəsizliyini və bu istiqamətdə gələcək əməkdaşlıq planlarını müzakirə etmək üçün yaxşı fürsətdir.
Nazir bu layihənin həyata keçirilməsində Gürcüstanın rolunu və artan imkanlarını xüsusi qeyd edib.