Bakı, 21 oktyabr.
Antiinhisar və İstehlak Bazarına Nəzarət Dövlət Xidmətinin tabeliyində olan Azərbaycan Standartlaşdırma İnstitutunun (AZSTANDART) nümayəndə heyəti Daşkənd şəhərinə işgüzar səfər edib.
AZSTANDART-dan bildirilib ki, səfər çərçivəsində nümayəndə heyəti Özbəkistan Standartlar İnstitutunun 55 illik yubileyinə həsr olunmuş “Standartlaşdırma, metrologiya və uyğunluğun qiymətləndirilməsi sahəsində innovativ ideya və inkişaf” yarmarkasında, o cümlədən “Davamlı tərəqqi üçün standartlaşdırma: beynəlxalq dialoq və innovativ həllər” Beynəlxalq elmi-texniki konfransında iştirak edib.
Bundan əlavə, AZSTANDART nümayəndələri MDB ölkələri Standartlaşdırma, Metrologiya və Sertifikatlaşdırma üzrə Dövlətlərarası Şuranın (МГС) Dövlətlərarası Texniki Komitələrin Əlaqələndirilməsi üzrə İşçi Qrupunun (РГ МТК) 14-cü iclasına, habelə Standartlaşdırma üzrə Elmi-Texniki Komissiyanın (НТКС) 68-ci müşavirəsinə qatılıblar.
“Davamlı tərəqqi üçün standartlaşdırma: Beynəlxalq dialoq və innovativ həllər” Beynəlxalq elmi-texniki konfransında AZSTANDART-ın baş direktoru İlham Bayramov “Azərbaycanda davamlı yaşıl inkişaf üçün standartlaşdırma” mövzusunda təqdimatla çıxış edib. Təqdimat zamanı institutun ümumi fəaliyyətindən, həyata keçirilən davamlı yaşıl inkişaf, o cümlədən enerji menecment layihələrindən bəhs olunub.
Dövlətlərarası Texniki Komitələrin Əlaqələndirməsi üzrə işçi qrupunun 14-cü iclasında yeni dövlətlərarası texniki komitələrin (MTK) yaradılması, mövcud MTK-ların birləşdirilməsi, tətbiq sahələrinin genişləndirilməsi və digər məsələlər müzakirə edilib.
Standartlaşdırma üzrə Elmi-Texniki Komissiyasının 68-ci müşavirəsində PQ МТK-nın 14-cü iclasının nəticələri, MQC 2030: İnkişaf strategiyasının icra vəziyyəti, 2024-2025-ci illər üçün Dövlətlərarası Standartlaşdırma Proqramı, standartların kataloqlaşdırılması üzrə yeni işçi qrupun yaradılması ətrafında fikir mübadiləsi aparılıb.
Qeyd edək ki, səfər çərçivəsində AZSTANDART-ın nümayəndələri Özbəkistan Texniki Tənzimləmə Agentliyinin rəhbər heyəti ilə də görüş keçirib. Görüşdə texniki tənzimləmə və standartlaşdırma sahələrində təcrübə mübadiləsi və qarşılıqlı əməkdaşlığın perspektivlərinə dair müzakirələr aparılıb.