Türk jurnalist: “Qafqaz Qartalı 2026” üç dost ölkənin dünyaya verdiyi həmrəylik mesajıdır
Hərbi təlimlər dostlara etimad, potensial rəqiblərə isə çəkindirici mesaj vermək məqsədi daşıyan fəaliyyətlərdir. Azərbaycan, Gürcüstan və Türkiyənin birlikdə keçirdiyi “Qafqaz Qartalı 2026” üçtərəfli təlimi də regionda təhlükəsizlik əməkdaşlığını nümayiş etdirən mühüm bir tədbir oldu. Bu təlim üç ölkənin qarşılıqlı etimadının, hərbi əməkdaşlığının yüksək səviyyəyə çatdığının və regional təhlükəsizliyə birgə töhfə vermək iradəsinin göstəricisidir.
Bu sözləri açıqlamasında türk jurnalist Zəki Gümüş söyləyib.
O bildirib ki, əslində bütün birgə hərbi təlimlərin əsas məqsədi iştirakçı ölkələrin koordinasiyasını gücləndirmək, hərbi hazırlıq səviyyəsini artırmaq və mümkün ssenarilər üzrə birgə fəaliyyət bacarıqlarını inkişaf etdirməkdir. NATO təlimlərində olduğu kimi, bu cür fəaliyyətlər də tərəfdaş ölkələrin hərbçilərinin bir-birini daha yaxşı tanıması baxımından böyük əhəmiyyət daşıyır.
“Bu təlimdə ən vacib məqam üç dost ölkənin dünyaya verdiyi birlik və həmrəylik mesajıdır. Bu mesajın hərbi müstəvidə verilməsi xüsusi əhəmiyyət kəsb edir. Burada söhbət ölkələrin bir-birinə dəstək göstərməsindən, hərbi sahədə təcrübə mübadiləsi aparmasından, komandanlıq səviyyəsində əməkdaşlığın inkişaf etdirilməsindən və birgə fəaliyyət imkanlarının artırılmasından gedir.
Belə təlimlərin mütəmadi davam etdirilməsi regionun təhlükəsizliyi və hərbi hazırlıq səviyyəsinin qorunması baxımından böyük əhəmiyyət daşıyır. Təlimlər zamanı iştirakçı ölkələr birgə əməliyyat qabiliyyətlərini yoxlayır, mövcud çatışmazlıqları müəyyən edir, yeni taktika və texnologiyaları sınaqdan çıxarır, eləcə də qarşılıqlı koordinasiyanı daha da təkmilləşdirirlər. Eyni zamanda, bu cür təlimlər real hərbi vəziyyət yaranacağı təqdirdə birgə fəaliyyətin necə həyata keçiriləcəyinin praktik məşqi hesab olunur. Bu baxımdan, həm şəxsi heyətin sahə hazırlığı artır, həm də beynəlxalq hərbi əməkdaşlıq və regional sabitlik möhkəmlənir”,- deyə Z.Gümüş vurğulayıb.
Türk jurnalist əlavə edib ki, Azərbaycan və Türkiyə arasında hərbi, siyasi və iqtisadi əməkdaşlığın yüksək səviyyədə olduğu məlumdur. Gürcüstanın da bu əməkdaşlıq formatında iştirak etməsi regionda sabitlik və təhlükəsizlik baxımından mühüm əhəmiyyət daşıyır. Bu baxımdan da “Qafqaz Qartalı 2026” regionda təhlükəsizlik əməkdaşlığını gücləndirən uğurlu və əhəmiyyətli hərbi təlim oldu. Formatın gələcək illərdə də davam etdirilməsi həm üç ölkə arasındakı strateji tərəfdaşlığın möhkəmlənməsinə, həm də regional təhlükəsizliyin gücləndirilməsinə mühüm töhfə verəcək.
