Aprelin 5-də keçiriləcək görüşdə Ermənistanın Rusiya və Azərbaycanla münasibətləri müzakirə olunmasa belə, bu tədbirdə mütləq regional istiqamət olacaq. Çünki Ermənistanla bağlı baş verənlər həm Rusiyaya, həm Azərbaycana, həm də bütün Cənubi Qafqaz regionuna, o cümlədən İrana da aiddir.
Bu fikirləri siyasi elmlər namizədi, Avropa İttifaqı üzrə ekspert Kamran Həsənov cümə günü Brüsseldə keçiriləcək ABŞ-Avropa İttifaqı-Ermənistan görüşünü şərh edərkən bölüşüb.
Çərşənbə günü Amerika tərəfinin təşəbbüsü ilə Azərbaycan Prezidenti İlham Əliyevin ABŞ-ın Dövlət katibi Antoni Blinken ilə telefon danışığında Birləşmiş Ştatların rəsmisi bəyan edib ki, aprelin 5-də keçirilməsi nəzərdə tutulan ABŞ-Avropa İttifaqı-Ermənistan üçtərəfli görüşü əsasən iqtisadi məsələlərə həsr olunub və Bakıya qarşı yönəlməyib.
Agentliyin həmsöhbəti deyib: “Bu görüş açıq şəkildə Ermənistanın Qərblə - ABŞ və Avropa ilə əlaqələrinin dərinləşməsinə yönəlib. Buna görə Avropa Komissiyasının rəhbəri Ursula Fon der Lyayen və ABŞ-ın Dövlət katibi Antoni Blinken orada olacaqlar. Bu formatda vurğulanır ki, Avropa və ABŞ, yəni Aİ və NATO əslində paralel kurslar aparır. Avropaya inteqrasiya Ermənistan üçün həm də NATO ilə inteqrasiya deməkdir. Qərb bu əməkdaşlığı məhz belə görür”.
Onun sözlərinə görə, məsələn, bu görüşdə Ermənistan-Azərbaycan münasibətlərinin gələcək nizamlanması taleyinin müzakirə olunması istisna olmaqla, Ermənistan prinsip etibarilə Azərbaycanla belə addımları əlaqələndirməyə bilər. “Yəni, Qərb obyektiv vasitəçi olmaq istəyirsə, burada iddialar Ermənistana deyil, qarşı tərəfi, yəni Bakını da dəvət etməli olan Qərbə ünvanlanmalıdır”, - deyə ekspert vurğulayıb.
Rusiyaya gəlincə, K.Həsənov bildirib ki, hazırda Rusiya-Ermənistan münasibətlərində böhranın şahidi oluruq. “Qərb bundan məharətlə istifadə edir. Paşinyanın iqtidarı dövründə Ermənistan inamlı addımlarla Rusiyadan uzaqlaşır. Bütün bunlar isə KTMT-dən çıxma bəyanatları fonunda baş verir”, - deyə o əlavə edib.
Bu baxımdan Gürcüstan və Ukraynadakı vəziyyətlərlə paralellər aparan siyasi elmlər namizədi Ermənistan da daxil olmaqla, bütün bu ölkələrdə məxməri inqilabların baş verdiyinə diqqət çəkib. Ekspert sonda deyib: “Gürcüstan: kursun dəyişməsi – anti-Rusiya əhvali-ruhiyyəsi – Rusiya bazaları ilə bağlı problemlər – müharibə – ərazi itkisi. Ukrayna: Rusiya ilə problem – Qərblə inteqrasiya istəyi – yeni rejim – ərazilərin itirilməsi. Ermənistan da birbaşa olaraq Rusiyanın ziyanına Qərblə inteqrasiya kursu götürüb. Fərq ondadır ki, Ermənistan öz ərazilərini yox, vaxtilə işğal etdiyi torpaqları itirib. Fəaliyyət prinsipi isə eynidir”.