Ağır avtomobil qəzası keçirən 61 yaşlı Reyhan Pənəyeva Mərkəzi Gömrük Hospitalına müraciət edib. Aprelin 9-da o, avtomobil qəzası ilə üzləşdiyindən çoxlu zədələr alıb. Xəstə ilkin olaraq başqa tibb müəssisəsində müalicə edilib, orada sağ dirsək oynağının tam çıxığı qapalı reduksiya edilib.

Aprelin 13-də zərərçəkən müalicəsini davam etdirmək üçün Mərkəzi Gömrük Hospitalına gətirilib. Aparılan müayinə zamanı sağ dirsək oynağının immobilizasiya vəziyyəti (sarğı/asqı ilə), qapalı reduksiyadan sonrakı vəziyyət, sol topuq oynağının oynaqdaxili yerdəyişmiş qapalı sınığı, sağ bud sümüyünün distal hissəsinin çoxparçalı açıq sınığı, həmçinin bud və baldır nahiyəsində yumşaq toxumaların əzilməsi qeydə alınıb. Daha sonra xəstə Təcili tibbi yardım şöbəsinə, oradan isə Reanimasiya şöbəsinə yerləşdirilib.

Aprelin 14-də həkim-cərrah Ramin Rzayev xəstənin üzərində əməliyyat aparıb. Əməliyyat zamanı sağ bud sümüyünün xarici fiksatorlarla osteosintezi, bud və baldır nahiyələrində yaraların yuyulması və drenaj olunması yerinə yetirilib. Üç gün sonra isə sol topuq oynağında medial malleolun qapalı osteosintezi əməliyyatı həyata keçirilib. Reanimasiya şöbəsində aparılan müalicədən sonra xəstənin vəziyyəti stabilləşib və o, aprelin 20-də stasionar şöbəyə köçürülüb.

Mayın 6-da xəstə üzərində sağ bud və baldır nahiyələrində yaranmış nekrotik dəri və yumşaq toxumaların tam təmizlənməsi (nekrektomiya) icra olunub. Hazırda onun vəziyyəti stabildir, yaralar təmiz və sakitdir, laborator göstəriciləri və bədən hərarəti normadadır. Müalicənin növbəti mərhələsinin ambulator və ev şəraitində davam etdirilməsi planlaşdırılır.