Azərbaycan gənclərinə Ulu Öndər Heydər Əliyevin böyük ərməğanı olan 2 Fevral - Gənclər Günü hər bir gəncə bu ölkə üçün tutduğu önəmi ifadə edən özəl tarixi gündür. Ümummilli Lider tərəfindən həyata keçirilən dövlət gənclər siyasəti gənclərimizin dövlətimizə layiq vətəndaş kimi yetişməsinin təməlini qoydu. Hazırda bu siyasət yüksələn xətlə davam etdirilir. Gənclərimiz bütün sahələrdə - təhsildə, elmdə, iqtisadiyyatda, mədəniyyətdə, ən əsası isə hərbdə böyük uğurlar qazanaraq tarixə adlarını qızıl hərflərlə yazdı. Məhz ona görə də Azərbaycan gəncləri bu il ilk dəfə olaraq suverenliyi bərpa olan dövlətin vətəndaşı kimi bu əlamətdar günü məğrur hislərlə qeyd edir.
Bu barədə Azərbaycan Respublikasının Gənclər Fondunun icraçı direktoru vəzifəsini icra edən Qədir Xəlilovdeyib.
Onun sözlərinə görə, Azərbaycan gəncləri iqtisadiyyatı inkişaf edən, hərbi gücü olan, təhsildə nailiyyətlər əldə edən, Xankəndisi, Laçını, Şuşası - Qarabağı olan, öz ata-baba yurduna qayıdaraq məskən salan və ən əsası isə bütün dünyanın gözündə qalib ölkənin vətəndaşlarıdır. İnanıram ki, məğrurluq, qürur, bütövlük hissi ilə yetişən gənclik gələcəkdə daha böyük uğurlar qazanacaq və Azərbaycanı daha böyük tərəqqiyə yüksəldəcək.
Bildirilib ki, dövlət gənclər siyasətini icra edən aparıcı qurumlardan biri olaraq Azərbaycan Respublikasının Gənclər Fondu da ölkə gənclərinin elmdə, təhsildə, ictimai-sosial fəaliyyətdə, mədəniyyətdə fəaliyyətini dəstəkləyərək onların layiqli vətəndaş kimi yetişməsinə töhfə verir. Hər il olduğu kimi, bu il də Fondun qarşısında duran əsas prioritetlərdən biri fəaliyyətimizlə bütün ölkə gənclərini əhatə etməkdir. Gənclər Fondu cari ildə də gənclərin və gənclər təşkilatlarının ideya və layihələrinin dəstəklənməsi məqsədilə qrant müsabiqələr elan edəcək, gənclərimizin iş təcrübəsi əldə etməsi üçün proqramlar həyata keçirəcək, sosial həssas qruplardan olan gənclərimizin təhsil xərcini maliyyələşdirəcək. Eləcə də beynəlxalq tədbirlərdə gənclərin iştirakını təmin edəcək, yaşıl dünya naminə həmrəyliyi özündə ehtiva edən proqramlar, beynəlxalq və yerli düşərgələr təşkil edərək gənclərimizin inkişafı naminə mütəmadi çalışacaq və onların digər sahələr üzrə də fəaliyyətlərini stimullaşdırmağa davam edəcək.
Dövlət tərəfindən gənclərimiz üçün yaradılan imkanlar və xidmətlər ölkə gənclərinə daim göstərilən diqqət və qayğının əsas təzahürüdür. Bu diqqəti və qayğını daim öz üzərində hiss edən Azərbaycan gəncliyi gələcəyə doğru daha inamlı addımlar atacağına inanır.