Bu gün keçirilən növbədənkənar prezident seçkiləri bir çox cəhətdən Azərbaycan xalqının taleyində xüsusi önəm daşıyır. İkinci Qarabağ savaşından sonra Qələbə sevincini xalq unudulmayan bir bayram təntənəsi kimi varlığına yığıb. Doğrudur, Qələbəmizin günü, tarixi Azərbaycanın taleyindən keçən müharibələrin yekunu, tarixi Qələbəsi kimi yadda qalıb. Hələ üstəlik, nəinki regiona, bütövlükdə dünyaya səs salan nadir hadisə də baş verdi. Azərbaycan dövləti Qarabağda separatizmin kökünü kəsdi, terrorçuları bir gündən də az vaxt ərzində sarsıdıcı zərbə ilə ağ bayraq qaldırmağa məcbur etdi. Separatçıların rəhbərləri isə ədalətli mühakimə üçün saxlanıldılar. Əlbəttə, inanırıq ki, onlar layiqli cəzalarını alacaqlar. Bütün bunlar zaman baxımından o qədər də vaxt tələb etmədi. Xalq yüksək fərəh və qürur hissi içərisində tarixi Qələbədən bəri ötən vaxtı yaşayıb.
Bu fikirləri müsahibəsində 220 saylı Cəbrayıl-Qubadlı seçki dairəsinin 7 saylı seçki məntəqəsində səsvermədə iştirak edən tanınmış şair, yazıçı-publisist Əli Rza Xələfli söyləyib. “Mən bütün ailəmlə birlikdə seçkidə iştirak edirəm. Onu da qeyd edim ki, nəvələrim Vətənin işğaldan azad edilməsi uğrunda inamla vuruşublar, döyüş uğurlarına görə təltif olunublar. Qürurluyam. Qalib ölkənin seçicisiyəm. Daha bir mühüm fakt da budur ki, Böyük Qayıdış başlayıb. Hətta bu il mənim sakini olduğum Cəbrayıla da köç olacaq. Həmin günü də səbirsizliklə gözləyirəm. Bütün bunlar tarixi şansı xalqımızın xeyrinə həll etmiş rəhbərə sonsuz sevgi və minnətdarlıq duyğuları yaradıb.
Vətən ağır yollardan keçdi. Biz artıq aydın bir səhərin parlaq işıqları altındayıq. Yolumuz uğurlu olsun. Vətənin əmin-amanlığı ən böyük istəyimizdir. Uğurlu seçim xalqın inamının bir daha təsdiqi olacaq”, - deyə o fikrini yekunlaşdırıb.