Qazax Rayon Mərkəzi Xəstəxanasında spirometriya testinin icrasına başlanılıb. Yeni aparatın tətbiqi həyata keçirilməkdədir. Spirometriya – tənəffüs hərəkətini müəyyən edən funksional testdir. Bu test ağciyərlərin funksiyasını, həyat tutumunu təyin edir.
Artıq rayon xəstəxanasında pasientlərdə spirometriya vasitəsilə tənəffüs yollarının keçiriciliyi, hava axınının sürətinin məhdudlaşmasının yoxlanılması həyata keçirilir. Proses qısa müddətdə, qeyri-invaziv, ağrısız və sadəcə, nəfəs alıb verməklə, üfürməklə həyata keçirilir.
Qeyd edək ki, bu testin bronxial astma, xroniki obstruktiv ağciyər xəstəliyi, sarkoidoz və s. ağciyər xəstəliklərinin diaqnostikasında, ağırlıq dərəcəsinin təyin olunmasında, müalicənin effektivliyinin dəyərləndirilməsində, sonrakı müalicə taktikasının seçilməsində, həmçinin, xəstəliyin proqnozunun qiymətləndirilməsində mühüm rolu var. Spirometriya testi vasitəsilə, eyni zamanda, siqaret çəkənlərdə ağciyərlərin funksiyasının qiymətləndirilməsi, əməliyyat öncəsi və sonrası xəstələrdə tənəffüs funksiyalarının dəyərləndirilməsi, obstruktiv, restriktiv xəstəliklərin diferensiasiyası da aparılır.