Bakı.

Paytaxtın Nizami rayonunda soyğunçuluq hadisəsi baş verib. Cəlilabad rayon sakini polisə müraciət edərək naməlum şəxsin ona məxsus mobil telefonunu ələ keçirdiyini bildirib.

Bu barədə Daxili İşlər Nazirliyinin mətbuat xidmətindən məlumata verilib.

Bildirilib ki, Nizami Rayon Polis İdarəsinin 24-cü polis şöbəsi əməkdaşlarının keçirdikləri tədbirlərlə soyğunçuluqda şübhəli bilinən əvvəllər oğurluqla əlaqəli cinayətə görə məhkum olunmuş 25 yaşlı E.Hüseynov saxlanılıb.

Həmçinin paytaxtın Xəzər və Qaradağ rayonlarında da iki nəfərin bank kartından oğurluq edilib. Rayon sakinləri polisə müraciət edərək kartlarından pul vəsaitlərinin talandığını bildiriblər. Polis əməkdaşlarının keçirdikləri tədbirlərlə əməli törətməkdə şübhəli bilinən 64 yaşlı A.Mansurov və 31 yaşlı E.Süleymanov saxlanılıblar.

Binəqədi və Qaradağ rayonlarında isə ümumi dəyəri 700 manat olan iki ədəd velosiped oğurlanıb. Paytaxt sakinlərinin ərazi polis orqanlarına etdikləri müraciət əsasında keçirilən tədbirlərlə oğurluqlarda şübhəli bilinən 48 yaşlı Ü.Qəhrəmanov və əvvəllər məhkum olunmuş 36 yaşlı F.Zeynalov müəyyən edilərək saxlanılıblar.

Faktlarla bağlı araşdırmalar aparılır.