Ekspert: Azərbaycanda müasir silahlarla təchiz olunmuş ordu yaratmaq istiqamətində mühüm addımlar atılır
ORDU
ŞƏRH
Ekspert: Azərbaycanda müasir silahlarla təchiz olunmuş ordu yaratmaq istiqamətində mühüm addımlar atılır
16.11.2025.
Ekspert: Azərbaycanda müasir silahlarla təchiz olunmuş ordu yaratmaq istiqamətində mühüm addımlar atılır
Bakı, 16 noyabr.
Son illərdə dövlət büdcəsindən Azərbaycan Silahlı Qüvvələrinə ayrılan vəsait artıb. Noyabrın 8-də Azadlıq meydanında keçirilmiş hərbi paradın əvvəlkilərdən fərqi Azərbaycan Xüsusi Təyinatlı Qüvvələrinin sayının çox olması idi. İstər 2016-cı ilin aprel döyüşlərində, istərsə də Vətən müharibəsində biz onların sayının artmasının şahidi olduq. Eyni zamanda Azərbaycan Ordusunun 2016-cı ildə ilk dəfə istifadə etdiyi dronlar 44 günlük müharibəsində çox uğurlu şəkildə tətbiq olundu.
Bu fikirləri açıqlamasında hərbi ekspert Tərlan Eyvazov söyləyib.
Onun sözlərinə görə, sonralar bu istiqamətdə işlər davam etdirilib. Komando qüvvələrinin yaradılması və onların sayının artırılmasına diqqət artırılıb. Bu 2023-cü ilin sentyabrında keçirilmiş bir günlük lokal xarakterli antiterror tədbirlərində özünü müvəffəq şəkildə göstərib. 2023-ci ildən indiyədək hər il yeni silahlar alınmaqdadır: “Biz, yalnız Müdafiə Nazirliyində deyil, digər güc strukturlarında da - Daxili Qoşunlarda, Sərhəd Qoşunlarında, kəşfiyyat və əks kəşfiyyat qurumlarında xüsusi təyinatlı qüvvələrin, komanda hərbi hissələrinin sayının artırılmasının şahidi olduq. Bunun bariz nümunəsini Azadlıq meydanındakı hərbi paradda gördük.
Bundan başqa, Azərbaycan Silahlı Qüvvələri hərbi dronların tətbiqi sahəsindəki üstün mövqeyini qoruyub saxlamaqdadır. Paradda İnsansız Sistem Qoşunları tərəfindən Ordumuzun pilotsuz uçuş aparatları və digər insansız vasitələr təqdim edildi. İsraildən hərbi hava qüvvələrinin arsenalına daxil olan yeni nəsil qurğular alınıb. Həmçinin “Bayraktar Akıncı” pilotsuz döyüş aparatlarının alınması üçün Türkiyə ilə imzalanmış müqavilələr uğurla icra olunur”.
Hərbi ekspert qeyd edib ki, hərbi hava qüvvələrinin silah arsenalına “JF-17” çoxməqsədli yeni qırıcı təyyarələr də daxil olub: “Çin və Pakistanın birgə istehsalı olan bu təyyarələr digərlərinə nisbətən daha kiçik, mobil, ucuz və müasirdir. Silahlanmaya yeni qəbul edilmiş və sürətlə hərəkət edən dəniz hədəflərini vura bilən KAYRA - kamikadze tipli suüstü dəniz vasitəsi Ordumuza dəniz əməliyyatlarında əlavə taktiki imkanlar qazandırır. Paradda Vətən müharibəsində sınaqdan keçirilmiş “LORA” əməliyyat-taktiki raket sistemlərinin keçidi oldu. Silahlanmaya yeni qəbul edilmiş uzaqmənzilli “NORA” artilleriya sistemləri NATO standartlarına uyğundur”.
T.Eyvazov bildirib ki, paradda təqdim olunan 155 millimetrlik uzaqmənzilli “DİTA” özüyeriyən artilleriya sistemləri döyüş sahəsinin tələblərinə uyğun olaraq texnikanın dəqiq zərbə vurmaq imkanlarını artırır. Ordumuzun kifayət qədər mobil və stasionar havadan müdafiə qurğuları mövcuddur. Buna baxmayaraq, paradda göstərilən və silahlanmaya yeni qəbul edilmiş “HQ-9” uzaqmənzilli zenit-raket kompleksi Azərbaycanın hava məkanının etibarlı müdafiə qabiliyyətinin təcəssümüdür.
Bütün bu silahları, qurğuları və avadanlıqları təhlil edərək Azərbaycan Ordusunun hərbi texnikaların alınmasında kəmiyyətdən keyfiyyətə yönəldiyi qənaətinə gəlmək olar. Beləliklə, ölkəmizdə daha peşəkar və müasir silahlarla təchiz olunmuş ordu modeli yaratmaq istiqamətində yeni addımlar atılır.
“Ordumuzun Hava Hücumundan Müdafiə Qoşunlarının arsenalına müxtəlif ölkələrdən alınmış stasionar və qeyri-stasionar mobil qurğuları daxil olduğundan Azərbaycanın aviasiya sahəsində artıq MDB-də qabaqcıl ölkələr arasında olduğunu görərik. Odur ki, ölkəmizin hava məkanına hər hansı hərbi müdaxilə olunarsa, Hərbi Hava Qüvvələrimiz təyyarə hücumlarının və raket zərbələrinin qarşısını çevik ala biləcək. Eləcə də, İsraildən və Türkiyədən pilotsuz uçuş aparatlarının (PUA) həm alınması, həm də Azərbaycanda birgə istehsalı çox uğurla davam edir”, - deyə T.Eyvazov vurğulayıb.
