Bakı, 19 noyabr.

Azərbaycan Respublikasında heyvanların identifikasiyası və qeydiyyatı normativ və texniki normativ-hüquqi aktlarla tənzimlənir. Məqsəd heyvan xəstəliklərinin diaqnostikası və profilaktikası üzrə baytarlıq tədbirlərinin həyata keçirilməsinə nəzarət etməkdir. Bu günə qədər ölkədə 824 min 599 heyvan identifikasiya edilib.

Bu barədə sorğusuna cavab olaraq Azərbaycan Qida Təhlükəsizliyi Agentliyinin (AQTA) İnformasiya təminatı və innovativ həllər şöbəsindən məlumat verilib.

Bildirilib ki, heyvanların identifikasiyası onların xəstəliklərinin diaqnostikası, profilaktikası və peyvəndləmənin izlənilməsi üçün əvəzolunmazdır. Bu, xəstəliklərin yayılmasını minimuma endirməyə və heyvanların ümumi sağlamlıq vəziyyətini yaxşılaşdırmağa kömək edir, hər bir heyvanın müayinə, müalicə və profilaktika keçmişinin sənədləşdirilməsinə imkan yaradır.

Eyni zamanda, qida zəncirinin izlənilməsi – “fermadan süfrəyə” konsepsiyasının qorunmasına zəmin yaradır. Kənd təsərrüfatı sahəsində heyvanların izlənilməsi məhsuldarlığın artırılmasına, heyvan mənşəli məhsulların izlənilməsinə və elmi araşdırmalara kömək edir.

Kənd təsərrüfatı heyvanlarının identifikasiyasının aparılması məcburidir və identifikasiya dövlət baytarlıq müfəttişlərinin nəzarəti altında həyata keçirilir, identifikasiya xərcləri mülkiyyətçilərin vəsaiti hesabına ödənilir.

Heyvanların identifikasiyası Avtomatlaşdırılmış Qida Təhlükəsizliyi İnformasiya Sistemi (AQTİS) vasitəsilə həyata keçirilir. Müvafiq qaydada identifikasiya olunaraq qeydiyyata alınmayan kənd təsərrüfatı heyvanlarının ölkə ərazisində hərəkətinə (heyvan kəsimi məntəqələrinə, bazarlara, digər təsərrüfatlara və s.) icazə verilmir.

Heyvan müvafiq qaydada identifikasiya olunaraq qeydiyyata alındıqda aqrar sığortanın predmeti hesab olunur. Heyvandarlıq sahəsi üzrə müəyyən edilən subsidiyanın alınması süni mayalandırılan heyvan və süni mayalanma nəticəsində doğulan hər bir sağlam buzov və balağ (camış balası) identifikasiya olunduğu halda mümkündür.