Azərbaycan Dövlət İnformasiya Agentliyi
CƏMİYYƏT
Lənkəranda yeni penitensiar kompleks cəzaçəkmə müəssisələrində sıxlığı aradan qaldırmağa xidmət edir
Ədliyyə Nazirliyinin rəhbərliyinin qərarı ilə böyük bir tərkib Lənkəranda yanvarın 15-də Prezident İlham Əliyev tərəfindən açılışı olmuş komplekslə tanış olmaq üçün bu gün bu şəhərə gəlib. Bu qərarı biz alqışlayırıq. Çünki cəzaçəkmə müəssisələrindəki durum, qidalanma, rejimin vəziyyəti, oradakı məhkumlara münasibət həmişə aktuallıq daşıyıb. Media məkanında buna xüsusi həssas yanaşma var və belə geniş təqdimatlar sübut edir ki, onlar cəmiyyətin diqqətinə burada görülən işləri göstərməkdə maraqlıdır.
Bunu jurnalistlərə açıqlamasında Milli Məclisin (MM) İnsan hüquqları komitəsinin sədri Zahid Oruc Ədliyyə Nazirliyinin Lənkəranda yeni istifadəyə verilmiş penitensiar kompleksində keçirilmiş mediatur zamanı deyib.
O bildirib ki, dövlətin cəza siyasəti mütləq humanizmə dayanır: “Bu, qanunvericilik sistemimdə 2017-ci ildən başlayaraq Cinayət Məcəlləsində üç yüzdən artıq maddənin dəyişdirilməsi və elektron qolbaqların, probasiya sisteminin tətbiqi ilə özünü göstərdi. Alternativ cəza tədbirləri həyata keçirildi. Amma ondan əvvəl - 1995-ci ildən başlayaraq əfv və amnistiya qərarları ilə ötən on illər ərzində müxtəlif şəraitlərdə cinayət törətmiş insanların azadlığa dönüşünə imkan yaradıldı. Bilirsiniz ki, 69 əfv qərarı verilib. Bunun nəticəsində 8 mindən çox insan azadlığa dönmək şansı qazanıb. Bunların arasında vurğulamaq istədiyimiz məsələ odur ki, həmin insanlar dövlətin humanizmini yüksək qiymətləndirərək təkrar cinayətlərə, yəni residivist kimi xarakterizə etdiyimiz hadisələrə yol verməyiblər. Birinci vitse-prezident Mehriban Əliyeva tərəfindən amnistiya təşəbbüsləri irəli sürülüb. Ümumilikdə 11 amnistiya aktı ilə on minlərlə insan azadlığa çıxıb.
Zahid Oruc deyib ki, MM-də rəhbəri olduğu İnsan hüquqları komitəsi hər il Ombudsmanın məruzə məlumatını dinləyərkən cəzaçəkmə müəssisələrindəki məhkumların sayı və sıxlıq şəraiti məsələsi qaldırılır: “Məsələn, ötən dəfə Ombudsmanın məruzəsində 1 100 yerlik cəzaçəkmə müəssisəsində 1 300-dən çox məhkumun saxlandığını qeyd edilirdi. Biz başa düşməliyik ki, cinayət törətmiş şəxs insanlığından deyil, azadlığından məhrum edilir. Daha ağır şəraiti yaratmaqla onu cəmiyyətə qaytarmağımız uğur deyil. Ona görə də bu sıxlıq şəraitində dövlətin yeni müəssisələrinin tikilməsi önəm daşıyır. Biz bu gün Lənkəranda istifadəyə verilmiş yeni penitensiar müəssisədə müasir şəraiti gördük. Bu addım cəzaçəkmə müəssisələrində sıxlığı aradan qaldırmağa xidmət edir. Dövlətimizin bu tədbirini hər birimiz alqışlayırıq”.
Komitə sədri bildirib ki, nə qədər cəmiyyət var, cinayətkarlar olacaq. Bu, ən müasir ölkələrdə də baş verir: “Bilirsiniz ki, ölkəmizdə 20 mindən artıq məhkum edilmiş şəxs var. Azərbaycan isə əhalinin 100 min nəfərinə düşən məhbus sayına görə dünyada 56-cı yerdədir. Bu rəqəm kifayət qədər yaxşı sayılır. Yeri gəlmişkən, cinayət törətmiş şəxslərin sayına görə ABŞ dünyada birinci yerdədir.
Bu mənada cəmiyyətdə kriminallıq aşağı vəziyyətdədir, kriminogen duruma nəzarət olunur. Yəni 1990-cı illərdə hökm sürən silahların insanlarda olması və sair halların ortadan qalxması ən mühüm nəticələrdən biridir. Ona görə də biz bu prosesi davam etdirməliyik”.