Qlobal imperializmin əsas mərkəzlərindən olan Fransa bu gün dünyada neomüstəmləkəçiliyi davam etdirən nadir ölkələrdəndir. Rəsmi Parisin dünyaya hansısa siyasi məsələlərlə bağlı məsləhət verməyə nə mənəvi, nə də hüquqi haqqı yoxdur. Fransa Senatı hazırda tamamilə provokasiya və manipulyasiyanın girdabındadır. Fransa ölkədə güclənən radikal neonasist siyasətini əyani şəkildə yaymağa davam edir. Artıq Parisin imkanları tükəndiyi üçün, erməni lobbisinin oyuncağına çevrilən Fransa Senatı Azərbaycana və Türkiyəyə düşmənçilik edir. Belə ikiüzlü siyasi sistemin daşıyıcılarının ölkəmizə qarşı hansısa məsələdə “məsləhət” vermək haqqı yoxdur. Fransa da, onun imperialist dairələri də Azərbaycandan hər bir mövzuda çox şey öyrənə bilər.
Bu sözləri Sosial Tədqiqatlar Mərkəzinin (STM) sektor müdiri, politoloq Tural İsmayılov söyləyib.
O bildirib ki, son 30 ildə Fransa hökuməti beynəlxalq hüququ heçə sayaraq Ermənistanın işğalçılıq siyasətini dəstəkləyib və rəsmi Paris öz bədnam əməllərini bu gün də davam etdirir. Ona görə də Fransa ilə Azərbaycan arasında münasibətlər heç də arzuolunan səviyyədə deyil.
“Fransa Ermənistandan Azərbaycana qarşı təsir vasitəsi kimi istifadə edir, ondan beynəlxalq platformalarda rupor kimi yararlanmağa çalışır və İrəvanı Qafqaza çıxış qapısı kimi görür. Bundan əlavə, Fransa məcburi şəkildə Ermənistanı istismar edərək onu Rusiya forpostluğundan çıxarmağa cəhdlər edir. Bu kontekstdə də Fransada Senat vasitəsilə ildə bir neçə dəfə şou göstərməyə cəhdlər olunur”, - deyə politoloq vurğulayıb.
Azərbaycanın beynəlxalq hüququ bərpa etməsinin işğalçı zehniyyətlərdə ciddi narahatlıq yaratdığını diqqətə çatdıran T.İsmayılov əlavə edib: “Bu səbəbdən Fransa da, onun müxtəlif siyasi institutları da obyektiv gerçəkliyi həzm edə bilmir. XXI əsrdə dünyaya istilaçı və kolonialist mövqelərdən yanaşmaq insan haqları və bəşəri dəyərlər prizmasından rəzalətdir. Coğrafi olaraq Fransaya heç bir aidiyyəti olmayan Qarabağ ermənilərindən siyasi maskarad yaratmağa çalışan bu ölkə Kaledoniya, Korsika, Mayottda ədalət prinsiplərini kobud şəkildə pozub. Fransanın bütün bəşəri və insani dəyərləri tapdalayaraq, beynəlxalq hüququ manipulyasiya etmək cəhdləri hər keçən gün daha da artır”.
Politoloqun sözlərinə görə, Fransa belə başa düşür ki, Azərbaycan-Ermənistan münasibətlərinin yaxşılaşması Parisin gələcəkdə İrəvan vasitəsilə Azərbaycan və Türkiyə əleyhinə istifadə etmək meyarlarını azalda bilər. Buna görə də Fransa aqressiv şəkildə anti-Azərbaycan mövqeyi tutmağa davam edir.