Fransanın Azərbaycana qarşı uğursuz həmlələri, regionda möhkəmlənmək cəhdlərinin iflasa uğraması bu ölkənin regiondakı nüfuzuna ciddi zərbə oldu. Dövlət Təhlükəsizlik Xidməti Fransa casus şəbəkəsini zərərsizləşdirməklə tək Azərbaycanı deyil, region ölkələrini və müəyyən qədər MDB dövlətlərini Parisin çirkin siyasətindən qorumuş oldu. İfşa edilən şəbəkə bizim regionda kök salmışdı və onların Azərbaycandakı uzantılarının məhvi Fransa kəşfiyyatına çox böyük zərbə oldu.
Bu sözləri politoloq Ramiz Alıyev Fransanın anti-Azərbaycan siyasətini şərh edərkən söyləyib.
Onun sözlərinə görə, bu gün Fransanın Azərbaycandakı səfiri Ann Buayonun Xarici İşlər Nazirliyinə çağırılması gözlənilən idi: “Fransa səfirliyinin iki əməkdaşı diplomatik statusa uyğun olmayan fəaliyyətlərinə görə “persona-non-grata” elan olundu və həmin şəxslərə ölkə ərazisini tərk etmək üçün 48 saat vaxt verildi. Aydın idi ki, Azərbaycan Fransanın şər və böhtanlarını, qərəzli addımlarını cavabsız qoymayacaq. Bir neçə gün öncə agentura şəbəkəsinin ifşası və bu gün də iki fransız diplomatın arzuolunmaz şəxs elan edilməsi Bakının ilk cavab addımlarıdır. Fransa Azərbaycana qarşı yürütdüyü siyasətdə artıq bütün hədləri aşıb. Fransanın bəzi şəhərlərində Azərbaycana aid sözlər, heykəllər götürülür. Özünü demokratiyanın beşiyi, dünya mədəniyyətinin mərkəzi sayan bir dövlət heç bir bəşəri dəyərlərə sığmayan addımlar atır. Dünyanın bir sıra ölkələrində, xüsusilə də Afrikada nüfuzunu sürətlə itirən Emmanuel Makron hökumətinin Azərbaycandakı “dayaqları” da məhv edildi. Fransa digər regionlardakı itkilərini Qafqazda kompensasiya etmək istəsə də, alınmadı. Fransa unutmasın ki, Qafqaz Azərbaycanın, Türkiyənin qırmızı xəttidir. Fransanın hətta Ermənistanda kök salması da Azərbaycanın milli maraqlarına təhdid hesab olunmalıdır. Xüsusilə də Azərbaycanın ərazi bütövlüyünə, suverenliyinə qarşı hədyanlar cavabsız qalmayacaqdı. Fransa hazırda Hindistanla əlbir olaraq Ermənistanı silahlandırmaqla məşğuldur. Azərbaycan dövləti, xüsusi xidmət orqanları onların fəaliyyətini yaxından təqib edir və lazımi məqamlarda cavab tədbirləri görür. ATƏT-in Minsk qrupunun həmsədri kimi uğursuz fəaliyyət göstərən bu ölkə illərlə status-kvonun saxlanması ilə bu münaqişənin uzanmasına çalışıb. Qafqazı münaqişə ocağına çevirməklə buranı təsiri altında saxlamaq istəyən Paris hazırda Ermənistandakı revanşist qüvvələri qızışdırmaqla məşğuldur. Fransa İrəvana silah göndərməklə Ermənistan və Azərbaycan arasında sülhün əldə edilməsinə mane olur. Dəfələrlə Fransanın BMT TŞ-də Azərbaycana qarşı qətnamə qəbul edilməsi cəhdləri də uğursuzluqla nəticələnib”.
Politoloq qeyd edib ki, əgər Fransa Azərbaycana qarşı siyasətini yumşaltmasa, təhdidlərə son qoymasa, Bakı digər rıçaqları işə salmaq məcburiyyətində qalacaq: “Ksenofobiya, islamofobiya kimi zərərli kampaniyalar aparmaqla hakimiyyətə gələn E.Makron iqtidarı İslam və Türk dünyasına qarşı revanşist siyasət yürüdür. Azərbaycanın güclənməsi, ərazi bütövlüyünü təmin etməsi Fransa kimi dövlətlərin maraqlarına uyğun gəlmir. Paris Ermənistandan alət kimi istifadə edir.
Faransa birmənalı şəkildə daim Ermənistanın yanında durub və Qarabağda separatizmə dəstək verib. Bu dəstək bu gün də davam edir. Azərbaycanın BMT-nin 4 mühüm qətnaməsini icra etməklə Qarabağı işğalçılardan azad etməsini Paris alqışlamaq əvəzinə, beynəlxalq hüquqa qarşı kampaniya aparır. Bildiyiniz kimi, Azərbaycan gələn il BMT-nin İqlim Dəyişikliyi üzrə Çərçivə Konvensiyasının Tərəfləri Konfransının 29-cu sessiyasına - COP29-a ev sahibliyi edəcək. Hətta Ermənistan dövləti belə, bu tədbirin Azərbaycanda keçirilməsinə dəstək verdiyi halda, rəsmi Paris buna qarşı çıxıb. Prezident İlham Əliyevin Fransanın müstəmləkəçilik siyasəti barədə açıq danışması E.Makron hökumətinin anti-Azərbaycan mövqeyi tutmasına və hətta ölkəmizdə casus şəbəkəsi yaratmasına səbəb olub. Təbii ki, bizim də əlimizdə Fransaya qarşı istifadə ediləcək kifayət qədər rıçaqlar var. Fransanın Azərbaycanda kifayət sayda şirkətləri fəaliyyət göstərir, qazanc əldə edirlər. Onlar hər il ölkəmizdən mənfəət götürür, gəlir qazanırlar. Bu qazanclar isə Fransaya göndərilir. Yəni, münasibətləri korlamaq Fransanın nə siyasi, nə də iqtisadı maraqlarına cavab verə bilməz. Düşünürəm ki, E.Makron Azərbaycana qarşı atdığı yanlış addımların fərqinə varacaq və xarici siyasətindəki aqressiya ya müəyyən qədər son qoyacaq”.