Azərbaycan Dövlət İnformasiya Agentliyi
SİYASƏT
13.01.2024 [11:32]
Yerli televiziya kanalları ilə ənənəyə çevrilən yanvar görüşü - EKSPERT
Bakı, 13 yanvar.
Müşahidə edirik ki, Prezident İlham Əliyev son 3 ilin hər birində yanvar ayında yerli televiziya kanalları üçün geniş müsahibə verir. Auditoriyanı maraqlandıran ən mühüm suallara bu görüşlər fonunda aydınlıq gətirilir. 2022 və 2023-cü illərdə əsası qoyulmuş bu prinsip 2024-cü ildə də davam etdirildi. Yanvarın 10-da Azərbaycan Prezidentinin yerli telekanallarla görüşü çərçivəsində həm daxili, həm də xarici siyasət kursu üzrə mühüm mesajlar verildi.
Bu sözləri Mətbuat Şurasının İdarə Heyətinin üzvü, media eksperti Müşfiq Ələsgərli söyləyib.
Ekspertin sözlərinə görə, Prezident İlham Əliyevin milli KİV-lərlə belə açıq təmasları sonradan bütün il boyu davam etdirilir, həm də transsərhəd media qurumlarını da əhatə edir: “Vətən müharibəsi dönəmindən başlayaraq, son 3 il ərzində Prezident İlham Əliyev təqribən 40-a yaxın transmilli KİV-ə geniş müsahibə verib. 2023-cü ildə də bu proses davam etdirilib. Çinin CGTN televiziya kanalına, "Euronews" telekanalına və digər transmilli KİV-lərə verdiyi müsahibələr beynəlxalq səviyyədə diqqət çəkib, reaksiyalar doğurub. Amma il üzrə ilk canlı təmasların məhz milli KİV-lər üzərindən, həm də geniş formatda gerçəkləşdirilməsi xüsusi önəm daşıyır. Bütün bunlar göstərir ki, Prezident İlham Əliyevin milli KİV-lərlə açıq təmasları mövsümi xarakter daşımır, ötücü-keçici amillərlə bağlı deyil. Münasibətlər davamlıdır, açıqdır, səmimi və interaktivdir. Belə yanaşma Azərbaycan KİV-lərində güvən hissini artırır, öz işini daha peşəkar formada qurmağa stimullaşdırır”.
Dövlətimizin başçısının son müsahibəsində diqqət çəkən mühüm məqamlardan birinin də onun səsləndirdiyi mesajlar olduğunu vurğulayan Müşfiq Ələsgərli deyib: “Bu mesajlar həm yerli, həm də xarici auditoriyaya ünvanlanıb. Xüsusi olaraq Azərbaycanın xarici siyasət kursu, təhlükəsizlik məsələləri, Ermənistanla danışıqların son durumu istiqamətində açıqlamalar oldu. Prezident İlham Əliyevin bu istiqamətlər üzrə açıqladığı planlar, proqramlar vətəndaşda məmnunluq yaratdı. Müsahibə zamanı səsləndirilən arqumentlər sübut etdi ki, Azərbaycanın bu günü kimi, gələcəyi də parlaq olacaq. Prezident İlham Əliyevin səmimi, arqumentli şəkildə səsləndirdiyi bu fikirlər inandırıcıdır, insanlarda məmnunluq yaradır”.