Vəkillərin İntizam Komissiyasının ilk iclasında 19 müraciət əsasında intizam icraatları üzrə 15 işə baxılıb
Kollegiyadan verilən məlumata görə, iclasda 19 müraciət əsasında (bunlardan 4 müraciət eyni icraatda olmaqla) başlanılan intizam icraatları üzrə 15 işə baxılıb, 3 iş əlavə araşdırma aparılması üçün təxirə salınıb, 12 iş üzrə rəylər qəbul olunub. Qəbul edilən rəylərdən 5 intizam işi üzrə vəkilin hərəkətlərində pozuntunun olması, 2 intizam işi üzrə vəkilin hərəkətlərində pozuntunun olmaması, 3 intizam işi üzrə vəkilin hərəkətlərinə hüquqi qiymət verilməsinin mümkün olmaması və 2 intizam işi üzrə icraata xitam verilməsinə dair məsələ qaldırılmasından ibarət olub.
Müvafiq rəylər qəbul edilən işlərin 9-u fiziki şəxslərdən, 3-ü isə məhkəmələrdən daxil olan müraciətlər əsasında başlanılan intizam icraatları üzrə olub.
Vəkilin hərəkətlərində pozuntunun olması barədə rəy verilən işlərin 3-ü fiziki şəxslərin, 2-si isə məhkəmələrin müraciətləri üzrədir. Məhkəmələrdən daxil olan 1 müraciət üzrə vəkilin hərəkətlərində pozuntunun olmaması barədə rəy verilib.
Vəkilin hərəkətlərində pozuntunun olması barədə rəy verilən 5 intizam işindən 2 intizam işi üzrə “vəkilin hüquqi yardımın göstərilməsi haqqında müqavilədə tapşırığın bir neçə ayrı-ayrı orqanlarda yerinə yetirilməsini göstərməsi və müqavilə ilə nəzərdə tutulan xidmət haqqını nağd qaydada əldə edib sonradan özü ödəməsi”, 1 intizam işi üzrə “vəkilin məhkəmə iclasında digər proses iştirakçısına qarşı qeyri-etik və qeyri-mədəni davranışa yol verməsi”, 1 intizam işi üzrə “vəkilin qabaqcadan təyin olunmuş məhkəmə iclasında hər hansı üzrlü səbəb olmadan və məhkəmə iclasının təxirə salınması ilə bağlı müraciətinə təxirə salınmanın üzrlü olması ilə bağlı sübut əlavə etmədən iştirak etməməsi” və 1 intizam işi üzrə “vəkilin hüquqi yardım göstərilməsi barədə müqavilədə nəzərdə tutulan xidmət haqqı ödənilmədən vəkil orderindən istifadə etməsi” halları intizam pozuntusu kimi qiymətləndirilib.
