Ölkəmizdə aztəminatlı və digər həssas kateqoriyadan olan insanların sağlamlığının qorunması istiqamətində ardıcıl tədbirlər həyata keçirilir.
Bu sözləri “Regional İnkişaf" İctimai Birliyinin nümayəndəsi Şəhla Talıbzadə Bakıda “Süd vəzi xərçənginin müalicəsinə müasir yanaşmalar” mövzusunda keçirilən beynəlxalq konfransda çıxışı zamanı söyləyib.
Ş.Talıbzadə bildirib ki, tibbi xidmətlərin keyfiyyətinin yüksəldilməsi, həkimlərin bilik və təcrübələrinin artırılması səhiyyə sahəsində xidmətlərin əhatəliliyini artırmağa imkan yaradır: “Əhalinin maarifləndirilməsi məsələsi də hər zaman diqqət mərkəzindədir. Bu istiqamətdə davamlı tədbirlər icra edilir”.
“Birinci vitse-prezident, Heydər Əliyev Fondunun Prezidenti Mehriban Əliyevanın təşəbbüsü və rəhbərliyi ilə səhiyyə sektorunda çoxşaxəli proqram və layihələr həyata keçirilir. Həmin proqram və layihələr çərçivəsində əldə olunan nailiyyətlər səhiyyə sahəsinə öz töhfəsini verməkdədir. “Regional İnkişaf” İctimai Birliyi tərəfindən son illər aidiyyəti qurumlar və tibb müəssisələri ilə birlikdə insanların sağlamlığı istiqamətində mühüm işlər görülür”, - deyə Şəhla Talıbzadə əlavə edib.