Quba, 20 noyabr.
Azərbaycan Dövlət Pedaqoji Universitetinin (ADPU) Quba filialında “Regionlarda ali təhsil: reallıqlar və perspektivlər” mövzusunda VI Beynəlxalq elmi konfrans işə başlayıb.
Altıncı dəfə təşkil edilən nüfuzlu elmi tədbirə Azərbaycan, Özbəkistan, Qazaxıstan, Rusiya, Türkiyə və Pakistandan, ümumilikdə, 101 elmi məqalə təqdim olunub. Məqalələrin 63-ü Azərbaycan, 38-i isə xarici ölkə tədqiqatçılarına məxsusdur.
Konfransın açılış mərasimində Quba Rayon İcra Hakimiyyəti başçısının müavini Səidə Abbasova, ADPU-nun rektoru, professor Cəfər Cəfərov, ADPU-nun Quba filialının direktoru, fizika elmləri doktoru, professor Yusif Alıyev, Milli Məclisinin deputatları Əlibala Məhərrəmzadə və Müşfiq Məmmədli, ADPU-nun elm və innovasiyalar üzrə prorektoru, professor Asəf Zamanov çıxış ediblər.
Bildirilib ki, noyabrın 21-dək davam edəcək konfransın əsas məqsədi regionlarda ali təhsilin inkişaf perspektivlərini müzakirə etmək, müasir çağırışlar fonunda təhsilin keyfiyyətinin yüksəldilməsinə, regional əmək bazarının tələblərinə uyğun kadr hazırlığına, elmi tədqiqatların praktik tətbiqinə və beynəlxalq akademik əməkdaşlığın genişləndirilməsinə töhfə verməkdir.
Konfransda Dövlət İmtahan Mərkəzinin Xaçmaz Regional Bölməsinin rəhbəri Faiq Nadirsoy, Özbəkistan Respublikasının Daşkənd Vilayəti Pedaqoji Ustalıq Mərkəzinin direktoru Timur Kalmuratov, Xaçmaz Dövlət Peşə Təhsil Mərkəzinin direktoru Tural Məmmədov və Coğrafiya İnstitutunun elmi kadrların hazırlanması sektorunun müdiri Müseyyib Yunusov çıxış edərək, konfransın elmi və ictimai əhəmiyyətini diqqətə çatdırıblar.
Beynəlxalq akademik əməkdaşlığın göstəricisi olaraq Özbəkistanın Termiz Dövlət Universitetinin prorektoru Obidjon Şofiyev və Mirzə Uluqbəy adına Özbəkistan Milli Universitetinin nümayəndəsi Mukhriddin Avezov açılış mərasimində onlayn formatda çıxış ediblər.
Çıxışlarda regionlarda ali təhsilin inkişaf etdirilməsi, elmi potensialın gücləndirilməsi, təhsildə innovativ yanaşmaların və müasir texnologiyaların tətbiqi, universitetlərlə əmək bazarı arasında qarşılıqlı əlaqələrin genişləndirilməsi, beynəlxalq elmi tərəfdaşlığın yeni istiqamətlər üzrə inkişaf etdirilməsi kimi aktual məsələlərə xüsusi diqqət yetirilib.
Konfrans çərçivəsində Yusif Alıyevin “ADPU-nun Quba filialının 35 illik inkişaf yolu – regional ehtiyaclardan beynəlxalq əməkdaşlığa” mövzusunda təqdimatı iştirakçıların diqqətinə çatdırılıb. Bildirilib ki, son altı ildə filialda tələbələrin sayı 65 faiz artaraq 1100 nəfərə, tədris olunan ixtisasların sayı isə 55 faiz artaraq 11-ə çatıb. Bu inkişaf göstəriciləri regionda ali təhsilə artan marağın və filialın təhsil imkanlarının genişləndirilməsinin mühüm nəticələrindəndir.
Filialın beynəlxalq əlaqələrinin genişləndirilməsi istiqamətində Qazaxıstanın Janibekov adına Pedaqoji Universiteti, Özbəkistanın Termiz Dövlət Universiteti və Asiya Texnologiyalar Universiteti, Qırğızıstanın Taştan Ermatov adına Bişkek Musiqi-Pedaqoji İnstitutu ilə yaradılmış elmi-akademik əməkdaşlıq imkanlarına da toxunulub.
Konfransın elmi proqramı regional ali təhsilin inkişafı ilə bağlı geniş istiqamətləri əhatə edir. Bölmə iclaslarında müəllim hazırlığı və tədris metodikası, süni intellekt və rəqəmsal təhsil, inklüzivlik, psixologiya və sosial iş, filologiya, tarix və mədəni irs, təbiət elmləri, ekologiya və aqrar tədqiqatlar, iqtisadiyyat, şəhərsalma, turizm və dayanıqlı regional inkişaf məsələləri ətrafında elmi müzakirələr aparılır. Müxtəlif ölkələrdən olan alim və tədqiqatçıların məruzələrində müasir pedaqoji yanaşmalar, təhsil sistemlərinin müqayisəli təhlili, elmi innovasiyaların tədrisə inteqrasiyası və elmi nəticələrin praktik tətbiqi imkanlarına xüsusi yer ayrılır.
Konfransın plenar iclasının ardından bölmə iclasları keçirilib.
Tədbir iştirakçılarının Qubanın tarixi-mədəni məkanları ilə tanışlığı da nəzərdə tutulur.