Bakı, 19 noyabr.
2027-ci il aprelin 22-24-də Bakı Mühəndislik Universitetində (BMU) “Mühəndislik problemlərinin həllində menecment və idarəetmə” (MaCoSEP 2027) mövzusunda beynəlxalq elmi konfrans keçiriləcək.
Universitetdən bildirilib ki, konfrans Azərbaycan, Türkiyə, Ukrayna, Macarıstan, Qazaxıstan, Özbəkistan və Yunanıstanın nüfuzlu elmi-tədqiqat və ali təhsil müəssisələrinin tərəfdaşlığı ilə təşkil olunacaq.
Tərəfdaşlar sırasında Elm və Təhsil Nazirliyinin İnformasiya Texnologiyaları İnstitutu və Riyaziyyat İnstitutu, Türkiyənin Ege və Balıkesir universitetləri, Ukraynanın V.M. Qluşkov adına Kibernetika İnstitutu və Kiyev Politexnik İnstitutu, Macarıstanın Debrecen Universiteti və digər elmi qurumlar yer alır.
Konfransın əsas məqsədi süni intellekt, maşın öyrənməsi, data analitikası və kibertəhlükəsizlik texnologiyalarına dair elmi müzakirələr aparmaq, müxtəlif ölkələri təmsil edən alim və tədqiqatçılar arasında əməkdaşlığı genişləndirməkdir.
Tədbir çərçivəsində intellektual idarəetmə sistemləri, qərar qəbuletmə texnologiyaları, risklərin idarə edilməsi və kritik infrastrukturların mühafizəsi kimi aktual elmi istiqamətlər üzrə fikir mübadiləsi aparılacaq.
Konfransa təqdim olunan məqalələr arasından seçilmiş elmi işlərin “Springer” nəşriyyatının “Communications in Computer and Information Science” (CCIS) seriyasında dərc edilməsi nəzərdə tutulur. Sözügedən seriya “Scopus” və “Clarivate” elmi bazalarında indekslənir. Məqalələrin nəşrə qəbulu müvafiq elmi qiymətləndirmə və nəşr tələblərinə uyğun həyata keçiriləcək.
Konfransın mühüm tarixləri, iştirak şərtləri və qeydiyyat qaydaları barədə ətraflı məlumatı buradan əldə etmək mümkündür.