“Portuqaliyada keçirilmiş Qran-Pri turnirində qazanılan 1 gümüş və 4 bürünc medalı yeni il üçün yaxşı başlanğıc hesab etmək olar. Bu baxımdan yığmanın nəticələrini müsbət qiymətləndiririk”.
Bu sözləri açıqlamasında Azərbaycan Cüdo Federasiyasının baş katibi Rəşad Rəsullu milli komandanın Portuqaliyanın Odivelaş şəhərində təşkil olunmuş Qran-Pri turnirindəki çıxışını dəyərləndirərkən deyib.
Federasiya rəsmisinin sözlərinə görə, bu yarış ilin birinci yarısına planlaşdırılan beynəlxalq turnirlərlə yanaşı, “Paris-2024” Yay Olimpiya Oyunlarına da hazırlıq xarakteri daşıyırdı: “Turnirlər Olimpiadaya lisenziya xallarının qazanılması, ehtiyat qüvvələrin sınaqdan keçirilməsi və növbəti Olimpiya dövrünün qiymətləndirilməsi baxımından mühüm əhəmiyyət kəsb edir. Aparıcı idmançılarımız müxtəlif səbəblərdən Qran-Pridə iştirak edə bilmədilər. Buna baxmayaraq, ümumi komandanın gücü göz qabağındadır”.
Baş katib bildirib ki, yarışı medalsız başa vuran bəzi idmançılardan gözləntilər yüksək idi: “Balabəy Ağayev (60 kiloqram), Nurlan Osmanov (73 kiloqram), Rəşid Məmmədəliyev (73 kiloqram) və Vüqar Talıbovdan (90 kiloqram) medal gözləyirdik. Təəssüf ki, Nurlan, Rəşid və Vüqar öz potensiallarını tam nümayiş etdirə bilmədilər, Balabəy isə yüngül zədə səbəbindən yeddinci yeri tutdu. Lakin qarşıda həlledici yarışlar var və əminəm ki, bu idmançılar öz bacarıqlarını göstərəcəklər. Qadınlardan ibarət komandada isə Gültac Məmmədəliyevanın (52 kiloqram) daha yaxşı nəticə qazanacağına ümid edirdik. Cüdoçularımız ilin əvvəlindən tədricən məşq ritminə qayıda biliblər. Onların növbəti yarışlarda daha yaxşı nəticələr əldə edəcəklərinə inamımız böyükdür”.
Zədə səbəbindən uzun müddət tatamiyə çıxa bilməyən Səid Mollayinin (81 kiloqram) də çıxışını dəyərləndirən R. Rəsullu deyib: “Onun performansı bizi qane etdi. Yaponiya idmançısına qarşı 1/4 final görüşündə hesabda öndə idi. Təəssüf ki, yaponiyalı idmançı qarşılaşmanın başa çatmasına 40 saniyə qalmış hesabı bərabərləşdirdi. Qızıl xal bölümündə isə cüdoçumuza qalib gəldi. Hesab edirəm ki, Səid bu yarışda kifayət qədər yaxşı çıxış etdi və artıq əvvəlki formasını bərpa etmək üzrədir. Təbii ki, bundan sonra hər şeyi qarşıdakı yarışlardakı nəticələr göstərəcək. Ümid edirik ki, Səid qısa zamanda özünün pik formasına qayıdacaq”.
Baş katib bu il Fransanın paytaxtı Parisdə təşkil olunacaq Olimpiadada cüdoçulardan gözləntilərini də açıqlayıb: “Olimpiya Oyunlarında cüdo yarışları iyulun 27-də başlayacaq. Püşkatma isə adətən bir gün əvvəl keçirilir. Püşkdən öncə nəyisə proqnozlaşdırmaq çətindir. Bununla belə, hər kəsi əmin edirəm ki, idmançılar, məşqçilər, tibbi heyət də daxil olmaqla, bütün federasiya əməkdaşları milli komandanın Parisdə ən yüksək səviyyədə mübarizə aparmasını təmin etməyə çalışır”.
Qeyd edək ki, Azərbaycan yığması Qran-Pri turnirini 5 medalla başa vurub. Yaşar Nəcəfov (66 kiloqram) gümüş, Turan Bayramov (60 kiloqram), Kamran Süleymanov (66 kiloqram), Səid Mollayi (81 kiloqram) və Elcan Hacıyev (90 kiloqram) bürünc medalın sahibi olublar.