Bakı, 20 Yanvar.

AFFA-nın Məşqçilərin maarifləndirmə şöbəsinin müdiri Aslan Kərimov milli assosiasiyanın yeni inkişaf strategiyasını dəyərləndirib.

Mütəxəssis açıqlamasında layihədə yer alan hər bir hədəfin ölkə futbolunun inkişafı üçün doğru istiqamət olduğunu bildirib.

“Sadalananları mərhələ-mərhələ həyata keçirmək lazımdır. Bu, heç də asan məsələ deyil. Ən vacibləri infrastrukturun yaxşılaşdırılması, akademiyaların tikilməsi, yeniyetmə və uşaq futbolunun inkişaf məsələləridir. Bunlarla yanaşı, kütləvilik də çox vacibdir. Hesab edirəm ki, kütləviliyə nail olmaq elə də çətin proses olmamalıdır. Azərbaycanda futbolu sevirlər. Ölkəmizdə futbol ən populyar və əsas idman növlərindən biri hesab olunur. İşğaldan azad edilmiş rayonlarımıza köç başlayandan sonra həmin ərazilərdə uşaqların futbolla məşğul olması üçün yaxşı şərait yaradılıb. Düşünürəm ki, belə təşəbbüslərin davamı gəlsə, futbolumuzun gələcəyi üçün bir o qədər yaxşı olar. Bunu gerçəkləşdirmək üçün böyük maliyyə də tələb olunmur. Bu baxımdan əsas məsələ infrastrukturdur. Bu istiqamətdə çoxlu işlər görmək lazım olacaq”.

Aslan Kərimovun sözlərinə görə yeniyetmə və uşaq futbolunun inkişaf məsələsi ilə yanaşı klublarımızın dayanıqlılığı olduqca mühüm mövzudur. Klublarımızın dayanıqlılığından ötrü böyük bir strategiya qurmağa da ehtiyac yoxdur. Yetər ki, maliyyə kifayət qədər dayanıqlı olsun. Maliyyə kifayət qədər olsa, klublarımızın inkişafı yavaş-yavaş gedəcək. Digər əhəmiyyətli məsələlərdən biri isə akademiyaların tikilməsi və idarə olunmasıdır: “Maarifləndirmə də bunun içərisində ən vacib amildir. Əgər yeni akademiya tikir və burada uşaq futbolunu inkişaf etdirmək istəyirsənsə, maarifləndirmə onun özəyini təşkil etməlidir. Çünki uşaqlara futbolu başa salan məşqçilər olmalı, məşqçiləri də yetişdirən maarifləndirmə və infranstruktur olmalıdır. Düşünürəm ki, bu iki istiqamətdə böyük işlər görmək lazımdır. Hazırkı durumda həm maarifləndirmədə, həm də infranstrukturda müəyyən çatışmazlıqlar var. Açığı, bunların nə dərəcə yerinə yetiriləcəyini bilmirəm. İnanıram ki, tez bir zamanda problemlərin öhdəsindən gələ biləcəklər. Ölkəmiz bu kimi məsələlərə maliyyə ayırmaq iqtidarındadır. Fikrimcə, müsbət mənada dəyişikliklər mütləq olacaq. Amma bunun nə dərəcə sürətli gedəcəyini demək çətindir. Əsas məsələ də məhz budur. Çünki hazırda çox geridəyik. Məqsədimizə çatmaq üçün biz böyük məsafə qət etməliyik”.

Veteran futbolçunun sözlərinə görə, layihənin uğurlu olması üçün nəzarət mexanizmi gücləndirilməlidir: “Əslində, həm strategiyamız düzgün istiqamətdədir, həm də prioritetlərimiz doğrudur. İnanıram ki, bu planları reallaşdırsaq, çox yaxşı yerlərə gəlib çıxacağıq. Nəzarət mexanizminin necə çalışacağını da zaman göstərəcək. Kimlərin nəyə necə nəzarət etməsi çox önəmlidir. Futbol kompetensiyası olmayan insan nəzarət edəcəksə, o zaman çətinlik yaşacağıq. Bizə yaxşı, təcrübəli mütəxəssislər lazımdır. Misal üçün, Premyer Liqada çalışan baş məşqçi həyatını yalnız böyüklərlə işləməyə həsr edibsə, onun uşaq və gənclərlə işləmə şansı yoxdur. Bu yöndə təcrübəsi olmadığından effektli işlər görə bilməcəyək. Buraya xüsusi olaraq uşaqlar və gənclərlə işləyən şəxslər cəlb olunmalıdır. Hansısa bir məşqçi Premyer Liqada böyük uğurlar əldə edibsə, bu o demək deyil ki, o uşaqlarla nələrəsə nail ola biləcək. Yaxud akademiyadakı işlə bağlı böyük təcrübəsi olan, uşaq futbolçu yetişdirən biri böyüklərin futboluna nəzarət edəsi olsa, onun işi uğurlu alınmayacaq. Bu baxımdan çox çətin mexanizmdir. Buna da insan resursları lazımdır. Ona görə də inkişafın hansı sürətlə, nə cür addımlarla gedəcəyini təxmin etmək çətindir. Bunu yalnız zamanla müşahidə edə bilərik”.