Azərbaycanın bütün sahələrdə zəngin təcrübəyə malik olması beynəlxalq əhəmiyyətli tədbirlər üçün ideal məkan kimi qəbul edilməsində əhəmiyyətli rol oynayır. Azərbaycanın irəli sürdüyü təşəbbüslər, qəbul etdiyi qərarlar ölkələr, xalqlar arasında əməkdaşlıq körpüsünün daha da möhkəmlənməsinə, dayanıqlı sülhün, təhlükəsizliyin təmin olunmasına xidmət göstərir. Noyabrın 24-də Bakıda BMT-nin Mərkəzi Asiya Ölkələrinin İqtisadiyyatları üçün Xüsusi Proqramının – SPECA-nın iştirakçı ölkələrinin dövlət və hökumət başçılarının Zirvə görüşü keçirildi. Son illərdə Azərbaycan bu Proqrama üzv ölkələrlə əməkdaşlığın daha da inkişaf etdirilməsi istiqamətində ciddi səylər göstərir və birliyə, həmrəyliyə davamlı töhfələr verir. Tarixi Zəfərimiz Azərbaycanın xarici siyasətinin əsas tərkib hissəsi olan ikitərəfli və beynəlxalq təşkilatlar çərçivəsində əlaqələrin daha da inkişafını şərtləndirdi. Dövlətimizin xarici siyasətində Mərkəzi Asiya ölkələri ilə əməkdaşlıq xüsusi yer tutur. Prezident İlham Əliyevin qeyd etdiyi kimi, “Azərbaycanı və Mərkəzi Asiya ölkələrini xalqlarımızın çoxəsrlik qardaşlıq münasibətləri bağlayır”.
Milli Məclisin deputatı Malik Həsənov bildirib.
Azərbaycanın bu regionda yerləşən ölkələrlə münasibətlərinin yaxınlaşmasını göstərən daha bir amilin qarşılıqlı səfərlər olduğunu söyləyən deputat qeyd edib: “Belə ki, son iki ildə Prezident İlham Əliyev Mərkəzi Asiya dövlətlərinə 10-dan çox səfər edib. Bu müddət ərzində bütün qardaş dövlətlərin başçıları isə ölkəmizə dəfələrlə səfərlər həyata keçiriblər. Hazırda Azərbaycan, Qazaxıstan, Qırğızıstan, Tacikistan, Türkmənistan və Özbəkistan bir sıra çoxtərəfli formatlarda uğurla əməkdaşlıq edir. Tədbirdə belə bir əminlik ifadə olundu ki, bu tərkibdə keçirilən Zirvə görüşü daha geniş iqtisadi əməkdaşlıq formatına yol açacaq”.
SPECA yarananda üzv ölkələrin dövlət müstəqilliklərinin ilk addımlarını atdıqlarını xatırladan M.Həsənov deyib ki, hər dövrün öz tələbi, çağırışları olur. Bu çağırışların düzgün cavablandırılması hər bir ölkənin iqtisadi inkişaf strategiyasının düzgün müəyyənləşdirilməsindən asılıdır. Azərbaycanın iqtisadi strategiyasını dünyanın qabaqcıl ölkələrinin təcrübəsinə əsasən müəyyənləşdirməsi hər bir çətinlikdən uğurla çıxmasında, dünyaya təkmil inkişaf modelini təqdim etməsində əhəmiyyətli rol oynayır. Neft siyasətinin məntiqi davamı olaraq qeyri-neft sektorunun inkişaf etdirilməsi Azərbaycanın iqtisadi tərəqqisinin davamlılığını təmin edir. Bu uğurların əsasında isə sabitlik dayanır. Ulu Öndər Heydər Əliyevin düşünülmüş və məqsədyönlü siyasəti nəticəsində Azərbaycanın sabitlik diyarına çevrilməsi investisiya axınının sürətləndirilməsində mühün amil oldu.
Qazanılan uğurlarda Azərbaycanın müstəqil siyasətinin rolunu xüsusi qeyd edən Milli Məclisin deputatı vurğulayıb: “Bu, özünü həm iqtisadi, həm də xarici siyasət uğurlarımızda aydın şəkildə nümayiş etdirir. Azərbaycanın iqtisadi imkanlarının genişlənməsində, dünya iqtisadi sisteminə inteqrasiyasında öz sözünü deyən “Əsrin müqaviləsi”nin imzalanması bunun bariz nümunəsidir. Azərbaycanın tarixə qovuşan Qarabağ münaqişəsinin həlli istiqamətində atdığı addımlar da müstəqil siyasətimizin təqdimatı oldu. Prezident İlham Əliyev Zirvə görüşündəki çıxışında vurğuladı ki, dünyada uğursuz, asılı, iki və ya daha çox stulda oturmaq istəyən, bir neçə ağaya xidmət edən, özünü daha böyük dövlətlərin qarşıdurma arenasına çevirən ölkələrin sayı az deyil. Onlardan biri Azərbaycanın qonşusu Ermənistandır. Belə ölkələrə, sözün əsl mənasında, müstəqil ölkə demək olmaz. Belə ölkələrin siyasəti xalqlarının iradəsinə əsaslanmır, onların taleyi xarici sponsorların əlindədir. SPECA-ya üzv dövlətlər isə əsl müstəqil ölkələrdir, çünki müstəqil xarici və daxili siyasət aparırlar”.
Deputat Zirvə görüşündə diqqət yönəldilən məsələlərin fonunda belə bir ümumiləşdirməni aparıb ki, Prezident İlham Əliyevin şəxsi nüfuzu, yürütdüyü siyasət, qazanılan uğurlar bu gün Azərbaycanın dünya birliyində yerini möhkəmləndirir. Azərbaycan yeni və uğurlu təşəbbüslərlə çıxış edən, beynəlxalq aləmdə öz sözünü deyən ölkəyə çevrilib. Ölkəmizin sədrlik etdiyi Qoşulmama Hərəkatında, həmçinin Türk Dövlətləri Təşkilatında, İslam Əməkdaşlıq Təşkilatında, İqtisadi Əməkdaşlıq Təşkilatında və digər qurumlarda fəaliyyəti onun qlobal miqyasda cərəyan edən proseslərə təsir imkanlarını genişləndirib. Sözügedən Zirvə görüşü Mərkəzi Asiya ölkələri ilə Azərbaycanın münasibətlərində yeni bir mərhələnin başlanğıcı oldu.