Prezident İlham Əliyevin Dünya Azərbaycanlılarının Həmrəyliyi Günü və Yeni il münasibətilə etdiyi müraciət bir sıra məsələlərlə tarixə keçdi. Hər şeydən əvvəl, 1991-ci ildə dövlət müstəqilliyinin bərpasından ötən zaman ərzində bir millət olaraq biz heç bir vaxt ili belə yüksək əhval-ruhiyyədə, tam rahat nəfəs alaraq yola salıb, yeni ili belə ruh yüksəkiliyi ilə qarşılamamışdıq.
Bu fikirləri Milli Məclisin deputatı professor Musa Qasımlı söyləyib.
O bildirib ki, 2023-cü il tariximizdə dövlət suverenliyimizin bütün ölkə ərazisində bərqərar edilməsi ilə yer tutdu.
“Biz 2024-cü ilə ölkəmizin ərazi bütövlüyünün və dövlət suverenliyinin tam təmini ilə qədəm qoyduq. Prezident İlham Əliyev yüzilliklərin planlarını pozdu, Azərbaycanda bir əsr əvvəl süni şəkildə yaradılmış problemi birdəfəlik həll etdi, çibanı kökündən kəsib atdı, gələcək nəsillərə buraxmadı. Çökən separatçı rejim Müzəffər Ali Baş Komandanın çəkmələri qarşısında diz çökdü, ağ bayraq qaldırdı, təslim oldu, torpaqlarımızdan əbədi olaraq çıxarıldı və tarixin zibilliyinə atıldı. Bununla da Azərbaycanda separatizmin kökü birdəfəlik kəsildi. Dövlət suverenliyinin tam bərqərar edilməsi ilə şəhidlərin, Xocalı soyqırımı qurbanlarının və həyatını itirmiş mülki insanların qisası döyüş meydanında alındı. Onların ruhları şaddır. Bütün bu uğurların memarı Prezident İlham Əliyevdir”, - deyə deputat fikrinə əlavə edib.
Musa Qasımlı qeyd edib ki, 2023-cü ilin hadisələri heç bir gücün Azərbaycanın dövlət rəhbərinin iradəsinə təsir edə bilməyəcəyini göstərdi.
“Laçın sərhəd-buraxılış məntəqəsi quraşdırılan zaman edilən təzyiqlərin rədd edilməsi gələcəkdə də belə xəyala düşənlərə dərs oldu. Azərbaycanın rəhbəri dünyaya bir daha dedi ki, ölkə ərazisində yeganə hakim qüvvə milli iradədir.
Prezidentin müraciəti müharibədən sonrakı dinc quruculuq dövründə Azərbaycan dövlətinin konkret və aydın planlarının olduğuna, onların ardıcıl surətdə həyata keçirildiyinə bir daha əminlik yaratdı. Qısa müddət ərzində böyük işlər görülüb. Şəhər və kəndlər yenidən qurulur. 2023-cü ildə 5 minə yaxın keçmiş köçkün öz doğma torpaqlarına qayıdıb. Ən böyük hadisələrdən biri 2024-cü ildə Kərkicahan, Malıbəyli, Turşsu kəndlərinin tam bərpa edilib keçmiş köçkünlərə verilməsi, Xocalı və Xankəndi sakinlərinin evlərinə qayıtmaları olacaq.
Prezident İlham Əliyev Qərbdə ikili standartlar yürüdənlərə və Ermənistana da xəbərdarlıq etdi. Bildirdi ki, Ermənistan rəhbərliyi bu tarixi dərslərdən nəticə çıxarmalıdır. Rəsmi İrəvan özünü elə aparmalıdır ki, Azərbaycanın qəzəbinə tuş gəlməsin.
Yeni ildə Ordumuzun daha da gücləndirilməsi planları sevindiricidir. Hərbi təyinatlı yerli istehsal prosesinə dövlət sektoru ilə yanaşı özəl sektorun da cəlb edilməsi ölkəmizdə yaranan yeni inkişaf meylidir”, - deyə Musa Qasımlı fikrini yekunlaşdırıb.