Bakı şəhəri, Yasamal rayonu, Alatava qəsəbəsində yerləşən fərdi yaşayış evində 2 nəfərin meyitinin aşkar olunması faktı ilə bağlı Yasamal Rayon Prokurorluğunda araşdırma aparılır.
Prokurorluqdan cavab olaraq bildirilib ki, ölümün səbəbinin müəyyən edilməsi məqsədilə məhkəmə-tibbi ekspertiza təyin edilib və digər zəruri hərəkətlər aparılır.
Fövqəladə Hallar Nazirliyindən bildirilib ki, “112” qaynar telefon xəttinə Alatava qəsəbəsində bağlı qapı arxasında köməksiz vəziyyətdə vətəndaşın qalması barədə məlumat daxil olub.
Məlumatla əlaqədar olaraq FHN-in Xüsusi Riskli Xilasetmə Xidmətinin müvafiq xilasetmə qüvvələri çağırış üzrə cəlb edilib. Xilasedicilərin keçirdikləri tədbirlər nəticəsində mənzildə aşkar olunmuş iki nəfərin meyiti aidiyyəti üzrə təhvil verilib.
Faktla bağlı aidiyyəti qurumlar tərəfindən araşdırma aparılır.